اسلام آباد ( پاک ترک نیوز) الیکشن کمیشن میں گوجرانوالہ کے ضمنی انتخابات کے دوران ضابطہ اخلاق کی مبینہ خلاف ورزی سے متعلق کیس کی سماعت ہوئی۔ چیف الیکشن کمشنر کی سربراہی میں تین رکنی بینچ نے کیس کی سماعت کی۔دورانِ سماعت اسپیشل سیکرٹری الیکشن کمیشن نے مؤقف اختیار کیا کہ وزیر اطلاعات عطا تارڑ نے انتخابی مہم کے دوران ہیلی کاپٹر پر حلقے کا دورہ کیا اور عوامی اجتماع سے خطاب بھی کیا، جو الیکشن ایکٹ اور ضابطہ اخلاق کی خلاف ورزی ہے۔ اسپیشل سیکرٹری کے مطابق اس خلاف ورزی پر دو سال تک سزا ہوسکتی ہے۔اس موقع پر چیف الیکشن کمشنر نے ریمارکس دیے کہ الیکشن کمیشن وزیراعظم اور حکومت کو احکامات جاری کرسکتا ہے، حکومت الیکشن کمیشن کو ہدایات نہیں دے سکتی۔
چیف الیکشن کمشنر نے اسلام آباد کے بلدیاتی انتخابات سے متعلق بھی ریمارکس دیتے ہوئے کہا کہ وفاقی حکومت سنجیدہ نظر نہیں آرہی، تاہم اسلام آباد میں بلدیاتی انتخابات ضرور ہوں گے۔ انہوں نے سوال اٹھایا کہ وزیراعظم نے کیسے حکم دے دیا کہ اساتذہ کی الیکشن ڈیوٹیاں نہیں لگائی جائیں گی، الیکشن کمیشن عملہ کہاں سے لائے گا؟سماعت کے دوران پنجاب اسمبلی کے اراکین کی سرزنش بھی کی گئی۔ پارلیمانی سیکرٹری صحت اسما عباسی کے مسکرانے پر چیف الیکشن کمشنر نے برہمی کا اظہار کرتے ہوئے کہا کہ آپ کی پنجاب اسمبلی کی نشست بھی جا سکتی ہے اور مسکرانے پر توہین عدالت کا نوٹس بھی جاری ہوسکتا ہے۔ڈپٹی کمشنر گوجرانوالہ نے مؤقف اختیار کیا کہ وزیر اطلاعات نے کنٹونمنٹ بورڈ کا دورہ کیا تھا، جو الیکشن کمیشن کے دائرہ اختیار میں نہیں آتا۔ اس پر چیف الیکشن کمشنر نے انہیں قانون پڑھ کر آنے کی ہدایت کی۔
یہ بھی پڑھیں: افغانستان سے منشیات اسمگلنگ کا عالمی نیٹ ورک بے نقاب، تاجکستان میں 9 ملزمان گرفتار
چیف الیکشن کمشنر نے بتایا کہ الیکشن کمیشن فیکٹ فائنڈنگ رپورٹ مرتب کر چکا ہے اور ڈی آر او، ڈی ایم او اور آر او کو رپورٹ پر تحریری جواب جمع کرانے کی ہدایت کی۔وزیر اطلاعات عطا تارڑ کی عدم موجودگی پر چیف الیکشن کمشنر نے استفسار کیا تو ان کے وکیل سجیل سواتی نے بتایا کہ وزیر اطلاعات سرکاری غیر ملکی دورے پر ہیں۔ چیف الیکشن کمشنر نے ریمارکس دیے کہ وزیر اطلاعات کو ذاتی حیثیت میں طلب کیا گیا تھا۔
الیکشن کمیشن نے آئندہ سماعت پر تمام فریقین کو ذاتی حیثیت میں پیش ہونے کا حکم دیتے ہوئے سی پی او گوجرانوالہ کو بھی طلب کرلیا۔ کیس کی مزید سماعت یکم دسمبر تک ملتوی کردی گئی۔
