اسلام آباد (پاک ترک نیوز )پاکستان اور سوڈان کے درمیان سفارتی تعلقات کے فروغ کے لیے اہم معاہدہ طے پا گیا، جس کے تحت دونوں ممالک کے سفارتی اور سرکاری پاسپورٹ رکھنے والے شہریوں کو ویزے سے استثنیٰ حاصل ہوگا۔
معاہدے پر دونوں ممالک کے وزرائے داخلہ نے دستخط کیے۔ معاہدے کے تحت پاکستان اور سوڈان کے ایسے شہری جو درست سفارتی یا سرکاری پاسپورٹ رکھتے ہوں، دونوں ممالک کے درمیان سفر کے لیے ویزے کے پابند نہیں ہوں گے۔
دونوں وزرا نے معاہدے کو دوطرفہ تعلقات مضبوط بنانے اور اعلیٰ سطح کے سرکاری تبادلوں کو آسان بنانے کی جانب اہم پیش رفت قرار دیا۔
سوڈان کے وزیر داخلہ کا کہنا تھا کہ اس معاہدے سے دونوں برادر ممالک کے درمیان دوستانہ تعلقات اور تعاون مزید مضبوط ہوگا۔
معاہدے سے سرکاری وفود کے دوروں میں سہولت پیدا ہوگی، جبکہ مختلف سرکاری اداروں کے درمیان تعاون کے نئے مواقع بھی پیدا ہوں گے۔
دونوں وزرائے داخلہ نے پاکستان اور سوڈان کے درمیان دوطرفہ تعلقات کو مزید وسعت دینے اور باہمی تعاون مضبوط بنانے کے عزم کا اعادہ بھی کیا۔
