اسلام آباد(پاک ترک نیوز) انتخابی اصلاحات کمیٹی میں سینیٹ کی نشستوں کی تقسیم کا فارمولا طے کرلیا گیا ہے، جس کے تحت مسلم لیگ ن، پیپلز پارٹی اور پاکستان تحریک انصاف کو دو، دو نشستیں دینے کی تجویز سامنے آئی ہے۔
مجوزہ فارمولے کے مطابق عوامی نیشنل پارٹی، بلوچستان عوامی پارٹی، نیشنل پارٹی اور جمعیت علمائے اسلام (ف) کو ایک، ایک نشست دی جائے گی۔
وزیر مملکت برائے پارلیمانی امور طارق فضل چوہدری کے مطابق کمیٹی کے ارکان کے ناموں کا حتمی فیصلہ مشاورت سے کیا جائے گا۔ اس سلسلے میں اپوزیشن، حکومتی اتحادی جماعتوں اور متعلقہ پارلیمانی قیادت سے بھی مشاورت ہوگی۔
طارق فضل چوہدری کا کہنا ہے کہ قائد ایوان اور نائب وزیراعظم سینیٹر اسحاق ڈار کمیٹی کے ارکان کے ناموں کو حتمی شکل دیں گے۔
یہ بھی پڑھیں: خیبر پختونخوا میں بلدیاتی انتخابات کا عمل روک دیا گیا
انتخابی اصلاحات کمیٹی میں حکومت اور اپوزیشن دونوں کی جماعتوں کو نمائندگی دی جائے گی، تاکہ انتخابی نظام میں بہتری کے لیے مختلف سیاسی جماعتوں کی تجاویز اور مؤقف کو شامل کیا جاسکے۔
