لاہور( پاک ترک نیوز) پرتگال کے عالمی شہرت یافتہ فٹبالر کرسٹیانو رونالڈو نے ایک بار پھر اپنی صلاحیتوں کا لوہا منواتے ہوئے سعودی کلب النصر کو شاندار فتح دلا دی۔ رونالڈو کی ہیٹ ٹرک کی بدولت النصر نے الخلود کو 3-5 سے شکست دے دی۔سعودی پرو لیگ میں 29 اکتوبر کو کھیلے گئے مقابلے کے پہلے ہاف میں دونوں ٹیموں کے درمیان سخت مقابلہ دیکھنے میں آیا اور اسکور 2-2 سے برابر رہا، تاہم دوسرے ہاف میں کرسٹیانو رونالڈو چھا گئے۔
رونالڈو نے صرف 15 منٹ کے دوران تین گول کرکے شاندار ہیٹ ٹرک مکمل کی۔ انہوں نے 66ویں منٹ میں جواؤ فیلکس کے پاس پر پہلا گول کیا، 72ویں منٹ میں ہیڈر کے ذریعے دوسرا گول اسکور کیا جبکہ 81ویں منٹ میں سادیو مانے کی مدد سے تیسرا گول کرکے ٹیم کی فتح یقینی بنائی۔اس ہیٹ ٹرک کے بعد کرسٹیانو رونالڈو کے کیریئر کے مجموعی گولز کی تعداد 985 ہوگئی ہے۔ فٹبال کی تاریخ میں 1000 گولز کا سنگ میل عبور کرنے کے لیے انہیں اب مزید صرف 15 گول درکار ہیں۔یہ رونالڈو کے شاندار کیریئر کی 67ویں ہیٹ ٹرک ہے جبکہ النصر کی جانب سے وہ اب تک 7 مرتبہ ہیٹ ٹرک کر چکے ہیں۔
یہ بھی پڑھیں: پنجاب میں فارماسیوٹیکل انڈسٹری تیزی سے ترقی کر رہی ہے، کاروبار کے لیے سازگار ماحول ضروری ہے، مریم نواز
کرسٹیانو رونالڈو نے اپنے کیریئر میں اسپورٹنگ لزبن، مانچسٹر یونائیٹڈ، ریال میڈرڈ، یووینٹس، النصر اور پرتگال کی قومی ٹیم کی نمائندگی کرتے ہوئے گولز اسکور کیے ہیں۔دلچسپ بات یہ ہے کہ رونالڈو نے اسی میچ کے پہلے ہاف میں بھی دو مرتبہ گیند جال میں پہنچائی تھی، تاہم دونوں گول آف سائیڈ قرار دے کر مسترد کر دیے گئے تھے۔
