ہالی ووڈ ( پاک ترک نیوز) ہالی وڈ میں سپر ہیروز کے مداحوں کے لیے بڑی خبر سامنے آ گئی، ڈی سی کی نئی فلمی کائنات میں بیٹ مین، ونڈر وومن، ٹین ٹائٹنز اور سویمپ تھنگ سمیت کئی نئی فلموں پر ابتدائی کام جاری ہے۔ نئی رپورٹ کے مطابق ان منصوبوں کی تیاری ابھی ابتدائی مراحل میں ہے، اس لیے فلموں کی ریلیز کی تاریخوں کا اعلان نہیں کیا گیا۔رپورٹ کے مطابق وارنر برادرز اور اس کی نئی کارپوریٹ انتظامی صورت حال کے باوجود ڈی سی کے سربراہ جیمز گن اور پیٹر سفران اپنے عہدوں پر برقرار رہیں گے۔ نئے انتظامی سربراہ ڈیوڈ ایلیسن نے انہیں ڈی سی کی موجودہ حکمت عملی جاری رکھنے کی ہدایت دی ہے۔
سب سے بڑی توجہ بیٹ مین کی نئی فلم پر ہے۔ فلم ’’بیٹ مین: دی بریو اینڈ دی بولڈ‘‘ کے ذریعے بیٹ مین کو ڈی سی کی نئی فلمی کائنات میں متعارف کرانے کا منصوبہ ہے۔ فلم کی ہدایت کاری اینڈی موسکیٹی سے منسوب کی جا رہی ہے، تاہم بیٹ مین کا کردار ادا کرنے والے اداکار کا باضابطہ اعلان ابھی نہیں ہوا۔ یہ منصوبہ رابرٹ پیٹنسن کی الگ فلمی دنیا میں بننے والی بیٹ مین فلموں سے مختلف ہوگا۔دوسری جانب ولن کرداروں پر مبنی فلم ’’سیویج ہنٹرز‘‘ بھی ابتدائی منصوبوں میں شامل ہے، جس میں بین اور ڈیتھ اسٹروک جیسے کرداروں پر توجہ دی جائے گی۔ تاہم اس فلم کی کہانی، اداکاروں اور ریلیز کے حوالے سے حتمی تفصیلات سامنے نہیں آئیں۔
یہ بھی پڑھیں: حنا جاوید قتل کیس کی ازسرِنو تحقیقات شروع، اعلیٰ سطحی کمیٹی کا جائے وقوعہ کا دورہ
ونڈر وومن کی واپسی بھی زیرِ غور ہے۔ اس فلم کا مسودہ آنا نوگیرا لکھ رہی ہیں۔ اداکارہ ایڈریا آرجونا کو ونڈر وومن کے کردار کے لیے منتخب کیے جانے کی خبریں بھی گردش کر رہی ہیں، لیکن اس کی باضابطہ تصدیق نہیں ہوئی۔ ان کی ممکنہ مختصر جھلک فلم ’’مین آف ٹومارو‘‘ میں دکھائے جانے کی اطلاعات بھی سامنے آئی ہیں۔اسی مصنفہ کے ذمے ’’ٹین ٹائٹنز‘‘ کی فلم بھی تھی، تاہم اطلاعات کے مطابق ونڈر وومن کے مسودے پر توجہ دینے کے لیے اس منصوبے کو مؤخر کیا گیا ہے۔فہرست میں ’’سویمپ تھنگ‘‘ کی فلم بھی شامل ہے، جس کے ذریعے اس کردار کو دوبارہ پردۂ سیمیں پر لانے کی تیاری کی جا رہی ہے۔
تاہم ڈی سی کے تمام منصوبے آگے نہیں بڑھ سکے۔ جیمز گن پہلے ہی ’’دی اتھارٹی‘‘ فلم کے خاتمے کی تصدیق کر چکے ہیں، جبکہ امانڈا والر کی مجوزہ سیریز کا مستقبل بھی غیر یقینی ہے۔ ’’کریچر کمانڈوز‘‘ کے دوسرے سیزن کی تیاری کا ذکر موجود ہے، لیکن اس کی تاریخ سامنے نہیں آئی۔رپورٹ کے مطابق ’’کلی فیس‘‘ 23 اکتوبر کو ریلیز ہونے والی ہے، جبکہ ’’مین آف ٹومارو‘‘ کی آمد 2027 کے موسمِ گرما میں متوقع ہے۔
