اسلام آباد(پاک ترک نیوز ) 27 ستمبر کو اسلام آباد لانگ مارچ کے معاملے پر پاکستان تحریک انصاف کی قیادت میں اختلافات سامنے آگئے ہیں۔ مارچ کی حکمت عملی تبدیل کرنے اور اسے ملتوی کرنے کی تجاویز پر مشاورت جاری ہے۔
ذرائع کے مطابق پی ٹی آئی کے بعض رہنماؤں نے مارچ کی تیاریوں کو ناکافی قرار دیا ہے، جبکہ 27 ستمبر کو پنجاب کی سرحد پر دھرنا دینے کی تجویز بھی زیر غور ہے۔
دوسری جانب پارٹی کے بعض رہنما 27 ستمبر کو ہی اسلام آباد کی جانب پیش قدمی کرنے پر اصرار کر رہے ہیں۔
ذرائع کا کہنا ہے کہ پی ٹی آئی قیادت مارچ کے حوالے سے مشاورت مکمل کرنے کے بعد کل حتمی حکمت عملی سامنے لائے گی۔
ادھر حکومت نے ممکنہ مارچ سے نمٹنے کے لیے سکیورٹی تیاریاں تیز کردی ہیں۔ اسلام آباد آنے والے راستوں پر کنٹینرز اور دیگر رکاوٹیں لگانے کا سلسلہ جاری ہے۔
وفاقی حکومت نے 27 ستمبر کو اسلام آباد میں مارچ نہ ہونے دینے کا اعلان کرتے ہوئے کہا ہے کہ قانون پر مکمل عملدرآمد کرایا جائے گا۔
وزیر داخلہ محسن نقوی کا کہنا ہے کہ اسلام آباد ہائیکورٹ کے احکامات کی خلاف ورزی کی اجازت نہیں دی جائے گی۔
