سیئول ( پاک ترک نیوز) رکشہ تو آپ نے بہت دیکھے ہوں گے، لیکن اب رکشے کی شکل بدلنے والی ہے! ہنڈائی نے تین پہیوں والی ایسی جدید الیکٹرک گاڑی تیار کرلی ہے جو مسافروں سے لے کر کورئیر سروس اور ایمرجنسی ریسپانس تک، کئی کام انجام دے گی۔ جنوبی کوریا کی معروف کمپنی ہنڈائی نے چھوٹی لیکن بڑے کام کی الیکٹرک گاڑی E3W کو پروڈکشن کے قریب پہنچا دیا ہے۔یہ گاڑی روایتی رکشے کا جدید اور ماحول دوست متبادل بننے کی تیاری میں ہے۔
ہنڈائی نے یہ منصوبہ بھارت کی معروف تھری ویلر کمپنی ٹی وی ایس موٹر کے ساتھ مل کر تیار کیا ہے، جہاں اس گاڑی کی تیاری اور ابتدائی فروخت بھی ہوگی۔خاص بات یہ ہے کہ E3W صرف مسافروں کو لانے لے جانے تک محدود نہیں ہوگی۔
یہ بھی پڑھیں: آسٹریلیا میں پٹرول گاڑیوں کے مقابلے میں برقی گاڑیوں کی فروخت زیادہ
اسے کورئیر اور سامان کی ترسیل، جبکہ ایمرجنسی سروسز کے لیے بھی استعمال کیا جاسکے گا۔اور اب ذرا اس کی خاص ٹیکنالوجی پر نظر ڈالیے!بارشوں اور سیلابی صورتحال میں سڑکوں پر پانی کھڑا ہو تو گاڑی کی گراؤنڈ کلیئرنس تبدیل کی جاسکے گی، جبکہ گرم موسم میں بہتر کارکردگی کے لیے کولنگ سسٹم بھی تیار کیا گیا ہے۔ڈرائیور کے آرام کا بھی خاص خیال رکھا گیا ہے۔گاڑی میں فلیٹ فلور، زیادہ وہیل بیس، موبائل فون ہولڈر اور سامان رکھنے کے لیے خصوصی پینلز شامل کیے گئے ہیں۔
ہنڈائی نے اس گاڑی کا تصور پہلی مرتبہ 2025 میں بھارت میں پیش کیا تھا، تاہم اب کمپنی اور ٹی وی ایس نے اسے باقاعدہ طور پر تیار کرکے بڑے پیمانے پر پروڈکشن کی جانب بڑھنے کا فیصلہ کرلیا ہے۔فی الحال گاڑی کی قیمت، بیٹری کی گنجائش، ایک چارج میں فاصلہ اور موٹر کی طاقت سامنے نہیں لائی گئی، جبکہ پروڈکشن شروع ہونے کی حتمی تاریخ بھی بتائی نہیں گئی۔یعنی آنے والے وقت میں سڑکوں پر صرف پٹرول اور ڈیزل کے رکشے ہی نہیں، بلکہ خاموش، جدید اور الیکٹرک تین پہیوں والی گاڑیاں بھی دوڑتی نظر آسکتی ہیں!
