کراچی(پاک ترک نیوز ) میئر کراچی مرتضیٰ وہاب نے کہا ہے کہ کراچی میں اب مرغا بننےکا وقت ختم ہو گیا، اب کام، ترقی اور تعمیر کا وقت ہے۔
کراچی میں میڈیا سے گفتگو کرتے ہوئے مرتضیٰ وہاب نے کہا کہ ضلع کورنگی میں ماضی میں ایک سیاسی جماعت کا راج تھا، تاہم اب یہاں پیپلز پارٹی کی باگ ڈور ہے اور شہر میں ترقیاتی کام جاری ہیں۔
میئر کراچی کا کہنا تھا کہ پیپلز پارٹی نے کورنگی میں متعدد اہم منصوبے مکمل کیے ہیں، جن میں کورنگی فلائی اوور، کورنگی کازوے، کورنگی نمبر 5 فلائی اوور، کورنگی ڈھائی برج اور عظیم پورہ فلائی اوور شامل ہیں۔
یہ بھی پڑھیں :کراچی کے اسپتال سے نومولود غائب،اسپتال انتظامیہ کی تردید ،واقعے کی تحقیقات شروع
انہوں نے کہا کہ شاہراہِ بھٹو کی تعمیر سے بھی ٹریفک نظام میں بہتری آئی ہے، جبکہ صنعتی علاقوں میں صنعتوں کے قیام اور سہولتوں کی فراہمی کے لیے بھی اقدامات کیے جا رہے ہیں۔
مرتضیٰ وہاب کے مطابق لانڈھی صنعتی علاقے کے لیے 2 ارب روپے جبکہ کورنگی انڈسٹریل ایریا کے لیے بھی 2 ارب روپے خرچ کیے جا رہے ہیں۔
میئر کراچی نے کہا کہ کراچی، سندھ اور پورے ملک کی ترقی کے لیے سب کو مل کر کام کرنا ہوگا۔ کراچی کو تبدیل کرنا اور اسے متعصب عناصر سے محفوظ رکھنا ہمارا مشترکہ مقصد ہے۔
