واشنگٹن(پاک ترک نیوز )اگست 2026 کا جزوی چاند گرہن 27 اور 28 اگست کی درمیانی شب رونما ہوگا، جس کے دوران زمین کا سایہ چاند کے تقریباً 96 فیصد حصے کو ڈھانپ لے گا۔
ماہرین کے مطابق گرہن کے عروج پر چاند کا بڑا حصہ زمین کے اندرونی سائے میں چلا جائے گا، جس کے باعث چاند سرخی مائل یا گہرے سرخ رنگ میں دکھائی دے سکتا ہے۔ یہ منظر اس وقت پیدا ہوگا جب سورج اور چاند کے درمیان زمین آ جائے گی اور زمین کا ماحول سورج کی روشنی کو موڑ کر چاند تک پہنچائے گا۔
یہ جزوی چاند گرہن شمالی امریکا، جنوبی امریکا اور یورپ و افریقا کے بعض علاقوں میں تقریباً 3.3 ارب افراد کو دکھائی دے گا۔
گرہن کے مختلف مراحل دنیا بھر میں ایک ہی وقت میں رونما ہوں گے، تاہم ہر ملک اور شہر میں مقامی وقت مختلف ہوگا۔
امریکا کے مغربی ساحلی علاقوں، جن میں لاس اینجلس اور پورٹ لینڈ شامل ہیں، میں گرہن اپنے عروج کے قریب غروبِ آفتاب کے چند گھنٹے بعد دیکھا جاسکے گا۔
امریکا کے مشرقی ساحلی شہروں نیویارک اور جیکسن ویل میں گرہن کا عروج مقامی وقت کے مطابق تقریباً نصف شب کے قریب ہوگا۔
