اسلام آباد(پاک ترک نیوز ) کئی سال کی تاخیر اور لاگت میں کئی گنا اضافے کے بعد اراکین پارلیمنٹ کے لیے نئی رہائش گاہوں کا منصوبہ تکمیل کے قریب پہنچ گیا۔
ذرائع کے مطابق اراکین پارلیمنٹ کے لیے 104 نئے فیملی سویٹس کی تعمیر کا مرحلہ ستمبر میں مکمل کرلیا جائے گا، جبکہ وزیراعظم شہباز شریف منصوبے کا افتتاح کریں گے۔
ذرائع کا کہنا ہے کہ اس وقت تقریباً 50 اراکین پارلیمنٹ سرکاری رہائش گاہ سے محروم ہیں۔ اسپیکر قومی اسمبلی ایاز صادق نے منصوبہ ہر حال میں ستمبر کے پہلے ہفتے تک مکمل کرنے کی ہدایت کردی ہے۔
اراکین پارلیمنٹ کے لیے 104 اضافی رہائش گاہوں کا منصوبہ 2010 میں شروع کیا گیا تھا، تاہم تعمیراتی کام میں مسلسل تاخیر کے باعث منصوبہ طویل عرصے تک زیر التوا رہا۔
ذرائع کے مطابق منصوبے کی ابتدائی لاگت تقریباً 3 ارب روپے تھی جو تاخیر کے باعث بڑھ کر 8 ارب روپے تک پہنچ گئی ہے۔
اسپیکر قومی اسمبلی ایاز صادق نے وزیراعظم شہباز شریف سے منصوبے کی تکمیل کے لیے خصوصی فنڈز بھی منظور کروائے۔
پارلیمنٹ لاجز اور پارلیمنٹ ہاؤس کی عمارات کا انتظامی کنٹرول قومی اسمبلی سیکرٹریٹ کے پاس ہے۔
