لاہور( پاک ترک نیوز) وزیراعلیٰ پنجاب مریم نواز کا کہناہے پنجاب میں عوام کو جدید اور معیاری طبی سہولیات کی فراہمی حکومت کی ترجیحات میں شامل ہے، جناح انسٹی ٹیوٹ آف کارڈیالوجی میں کل سے ہارٹ ٹرانسپلانٹ کا آغاز کردیا جائے گا۔
جناح انسٹی ٹیوٹ آف کارڈیالوجی کی افتتاحی تقریب سے خطاب کرتے ہوئے وزیراعلیٰ پنجاب نے کہا جناح انسٹی ٹیوٹ آف کارڈیالوجی کی تکمیل ان کا خواب تھا، آج کا دن ان کے لیے انتہائی اہم ہے۔ پورے پاکستان سے امراض قلب کے مریض یہاں علاج کے لیے آسکتے ہیں۔انہوں نے کہا کہ وزیر صحت پنجاب سمیت پوری ٹیم نے جناح انسٹی ٹیوٹ آف کارڈیالوجی کی تکمیل کے لیے دن رات کام کیا، جبکہ ڈاکٹر حسنات سمیت تمام ڈاکٹرز کی خدمات گراں قدر ہیں۔
مریم نواز نے کہا کہ ملک میں عارضہ قلب کے مریضوں میں تشویشناک اضافہ ہورہا ہے، دنیا میں صحت سے بڑی کوئی نعمت نہیں۔ اللہ تعالیٰ نے بااختیار لوگوں کو عوام کی خدمت کے لیے چنا ہے اور عوام کی فلاح و خدمت کرنے والوں کے لیے اللہ کے ہاں بڑا انعام ہے۔
وزیراعلیٰ پنجاب کا کہنا تھا کہ روزانہ کی بنیاد پر عوامی فلاح کے فیصلے کرنا بھی ان کی ذمہ داریوں میں شامل ہے، ہر انسان کو دیانت داری سے اپنی ذمہ داری نبھانی چاہیے۔انہوں نے اعلان کیا کہ جناح انسٹی ٹیوٹ آف کارڈیالوجی میں ہارٹ ٹرانسپلانٹ کے لیے خصوصی فنڈ قائم کیا جائے گا۔ ان کے مطابق ہارٹ ٹرانسپلانٹ کے کم از کم اخراجات تقریباً 50 ہزار ڈالر ہیں، تاہم پنجاب کے مریضوں کے لیے امراض قلب کا علاج بالکل مفت فراہم کیا جائے گا۔مریم نواز نے سیاسی صورتحال پر بات کرتے ہوئے کہا کہ سیاسی جماعتوں نے مسلم لیگ ن کو اپنا ہدف بنایا ہوا ہے، حالانکہ سیاسی جماعتوں کا کام عوام کی فلاح و بہبود ہونا چاہیے۔
یہ بھی پڑھیں: مریم نواز کا ستھرا پنجاب ورکرز کو ہر ماہ 5 تاریخ سے پہلے ادائیگی یقینی بنانے کا حکم
ان کا کہنا تھا کہ مسلم لیگ ن کی سیاست کی بنیاد خدمت کے نظریے پر ہے، اگر تمام سیاسی جماعتیں خدمت کی روش اپناتیں تو ملک ترقی کرتا۔وزیراعلیٰ پنجاب نے کہا کہ حکومت پنجاب عوام کو صحت کی بہترین سہولیات فراہم کرنے کے لیے اقدامات جاری رکھے گی اور امراض قلب کے علاج کو مزید مؤثر اور عام آدمی کے لیے قابل رسائی بنانے پر خصوصی توجہ دی جا رہی ہے۔
