اسلام آباد ( پاک ترک نیوز) وفاقی وزیر اطلاعات عطاء تارڑ نے کہا ہے کہ بانی پی ٹی آئی عمران خان کے علاج کے حوالے سے کوئی ابہام نہیں، صحت کی سہولیات کی فراہمی ہر قیدی کا بنیادی حق ہے اور صحت کے معاملے کو سیاست سے الگ رکھا جانا چاہیے۔
اسلام آباد میں نیوز کانفرنس کرتے ہوئے عطاء تارڑ نے کہا کہ حکومت بانی پی ٹی آئی کی صحت کے حوالے سے اپنی ذمہ داری پوری کررہی ہے، انہیں ماضی میں بھی صحت سے متعلق تمام ضروری سہولیات فراہم کی گئی ہیں۔
وفاقی وزیر اطلاعات کا کہنا تھا کہ مسلم لیگ ن نے کبھی صحت کے معاملے پر سیاست نہیں کی، تاہم بانی پی ٹی آئی ماضی میں صحت کے معاملات پر طعنے دیتے اور سیاست کرتے رہے ہیں۔
عطاء تارڑ نے کہا کہ واشنگٹن میں منہ پر ہاتھ پھیر کر یہ کہا گیا تھا کہ گھر کا کھانا بند کردوں گا، لیکن موجودہ حکومت نے بانی پی ٹی آئی کو طبی سہولیات کی فراہمی میں کوئی رکاوٹ نہیں ڈالی۔
یہ بھی پڑھیں: بانی پی ٹی آئی کی شفا اسپتال منتقلی کا حکم چیلنج
دوسری جانب وزیر مملکت طلال چودھری نے کہا کہ دھمکی، ڈکٹیٹ کرنے، سڑکیں بلاک کرنے یا حملے کرنے سے ملاقات نہیں ہوگی۔طلال چودھری کے مطابق حکومت کا مؤقف پہلے دن سے واضح ہے، جیل مینوئل کے تحت عدالت ملاقات کا حکم دے سکتی ہے۔
انہوں نے کہا کہ ملاقاتوں اور دیگر معاملات کے لیے جیل قوانین میں واضح طریقہ کار موجود ہے اور اسی کے مطابق معاملات کو آگے بڑھایا جائے گا۔
