تہران ( پاک ترک نیوز) ایرانی پاسداران انقلاب کے نائب کمانڈر میجر جنرل مصطفیٰ ایزدی نے کہا ہے کہ دشمن کی جانب سے ایران کی جوہری صنعت کو تباہ کرنے کی کوششوں کے باوجود ایران جوہری ٹیکنالوجی اور سائنسی ترقی کا سفر بھرپور قوت سے جاری رکھے گا۔
ایرانی میڈیا کے مطابق ایک تقریب سے خطاب کرتے ہوئے میجر جنرل مصطفیٰ ایزدی نے کہا کہ دشمن نے اسلامی جمہوریہ ایران کا تختہ الٹنے اور ملک کو تقسیم کرنے کے مختلف منصوبوں کے ساتھ محاذ آرائی شروع کی، تاہم اسے تمام محاذوں پر ناکامی کا سامنا کرنا پڑا۔
انہوں نے کہا کہ دشمن ایران کی جوہری صنعت تک رسائی حاصل کرنے میں بھی کامیاب نہیں ہوسکا، ایران ملک کی جوہری، سائنسی اور ترقیاتی پیشرفت کا راستہ مضبوطی سے جاری رکھے گا۔ایرانی جنرل کے مطابق مخالف قوتوں نے ایران کو کمزور کرنے، حکومت کا تختہ الٹنے، ملک کو تقسیم کرنے، تیل کے وسائل اور آبنائے ہرمز پر کنٹرول حاصل کرنے سمیت ایرانی اسلامی تہذیب کو نقصان پہنچانے کی کوششیں کیں۔
مصطفیٰ ایزدی نے دعویٰ کیا کہ ایرانی مسلح افواج اور مزاحمتی محاذ کو ختم کرنے اور ملک کی جوہری صنعت کو تباہ کرنے کے منصوبے بھی ناکام بنائے گئے۔انہوں نے کہا کہ ایران نے اللہ پر بھروسے اور قیادت کی رہنمائی میں ان تمام مشکل مراحل پر قابو پایا ہے۔ایرانی جنرل نے عالمی صورتحال کا ذکر کرتے ہوئے کہا کہ دنیا میں ہونے والی بڑی تبدیلیاں امریکی طاقت کے زوال کی نشاندہی کرتی ہیں۔
یہ بھی پڑھیں: ایک بار پھر فوجی ایکشن کے ذریعے سفارتکاری کی تکمیل کا وقت آگیا، باقر قالیباف
مصطفیٰ ایزدی نے ایرانی مسلح افواج کی دفاعی صلاحیتوں کو بھی اجاگر کرتے ہوئے کہا کہ آبنائے ہرمز پر مکمل کنٹرول، میزائل صلاحیتوں میں نمایاں پیشرفت اور جدید فضائی دفاعی نظام نے ایران کی غیر معمولی دفاعی قوت میں اضافہ کیا ہے، جس کے باعث مخالفین کو محتاط رویہ اختیار کرنا پڑا ہے۔
