پاکستان سے غزہ کے لئے مزید امدادی سامان روانہ

لاہور (پاک ترک نیوز)
پاکستان سے غزہ کے لئے سو ٹن خوراک اور امدادی سامان کی 23ویں کھیپ قطر ائر ویز کے ذریعے لاہور سے غزہ روانہ کر دی گئی ہے۔
گورنرپنجاب سردار سلیم حیدر خان نے صوبائی دارالحکومت کے ہوائی اڈے سے این ڈی ایم اے کی جانب غزہ اور فلسطین کے مسلمانوں کے لئے امدادی سامان کا جہاز روانہ کیا۔ اب تک غزہ بھجوائے گئے امدادی سامان کی 23کھیپیں روانہ کی جا چکی ہیں۔ جن میںمجموعی طور پر 2ہزار 227ٹن امدادی سامان روانہ کیا جاچکاہے ۔
گورنر پنجا ب نے اس حوالے سے این ڈی ایم اے کے کردار کو سراہتے ہوئے کہا کہ غزہ کو سامان کی فراہمی پر این ڈی ایم اے نے بھرپور کرداد ادا کیا ہے۔امدادی سامان میں کپڑے، ادویات،خشک راشن اور کھانے پینے کی اشیاءشامل ہیں۔ گورنر نے کہا کہ غزہ اور فلسطین کے مظلوم مسلمان ہمارے بھائی ہیں اور اس مشکل وقت میں انکی مدد ہمارا دینی فرایضہ ہے۔ انہوں نے کہا کہ اسرائیل دنیا میں امن کیلئے خطرہ بن چکا ہے۔فلسطین میں انسانیت کے قتل عام پر اقوام متحدہ اسرائیلی دہشت گردی کا سختی سے نوٹس لے۔گورنر پنجاب نے زور دیکر کہا کہ تمام اسلامی ممالک کو مل کر فلسطین کا ساتھ دینا ہوگا۔