ریاض ( پاک ترک نیوز) سعودی وزارتِ سیاحت نے حج سیزن کے دوران عازمین کو رہائش فراہم کرنے والی عمارتوں کے لیے نئے ضوابط اور معیار کی منظوری دے دی، جن کا مقصد حج 2027 سے قبل رہائشی سہولیات کی تیاری، حفاظت اور سروس کا معیار بہتر بنانا ہے۔
سعودی پریس ایجنسی کے مطابق مکہ مکرمہ اور مدینہ منورہ میں عازمین حج کی میزبانی کرنے والی رہائشی سہولیات کے لائسنس، درجہ بندی، آپریشنل شرائط اور خلاف ورزیوں سے متعلق قواعد میں ترامیم کی گئی ہیں۔
وزارتِ سیاحت کے ترجمان نصر الانصاری کے مطابق نئے ضوابط سے رہائشی سہولیات کے لیے ریگولیٹری اور آپریشنل فریم ورک مزید مضبوط ہوگا اور عازمین کی آمد سے قبل عمارتوں کی مکمل تیاری یقینی بنائی جائے گی۔
نئے قواعد کے تحت رہائشی عمارتوں کو اکانومی اور فرسٹ کلاس میں تقسیم کیا جائے گا، جبکہ ہر کیٹیگری کے لیے الگ معیار مقرر ہوگا۔
نئے معیار میں عمارت کے مشترکہ حصوں، کمروں، استقبالیہ، صفائی، دیکھ بھال اور مہمانوں کو فراہم کی جانے والی سہولیات سے متعلق تفصیلی شرائط شامل ہیں۔
عازمین کی رہائش گاہوں میں آپریشنل تیاری، حفاظتی انتظامات، مرمت و دیکھ بھال اور ضروری خدمات کی دستیابی کو یقینی بنانا لازمی ہوگا۔
وزارتِ سیاحت کے مطابق لائسنس جاری کرنے سے قبل، آپریشن شروع ہونے سے پہلے اور حج سیزن کے دوران بھی رہائشی سہولیات کی مسلسل نگرانی اور معائنہ کیا جائے گا تاکہ قواعد پر عمل درآمد اور سروس کے معیار کو یقینی بنایا جاسکے۔
سعودی وزارتِ سیاحت نے عازمین حج کی میزبانی کو ’’مشترکہ قومی ذمہ داری‘‘ قرار دیتے ہوئے کہا ہے کہ حجاج کی خدمت سعودی عرب کی صدیوں پر محیط روایت کا حصہ ہے۔
وزارت کے مطابق نئے معیارات کا مقصد عازمین کو محفوظ، منظم اور بہتر رہائشی ماحول فراہم کرنا اور سعودی عرب کی جانب سے حجاج کی خدمت کے عزم کو مزید مضبوط بنانا ہے۔
سعودی جنرل اتھارٹی فار اسٹیٹسٹکس کے مطابق حج 2026 میں 17 لاکھ سے زائد عازمین نے فریضہ حج ادا کیا۔
ان میں بیرون ملک سے آنے والے عازمین کی تعداد 15 لاکھ 46 ہزار 655 جبکہ سعودی عرب کے اندر سے حج ادا کرنے والے شہریوں اور مقیم افراد کی تعداد ایک لاکھ 60 ہزار 646 رہی۔
سعودی وزارتِ سیاحت نے بتایا کہ گزشتہ حج سیزن کے دوران مکہ مکرمہ اور مدینہ منورہ میں رہائشی اور عارضی رہائشی سہولیات کی نگرانی کے لیے 19 ہزار سے زائد معائنے کیے گئے۔
یہ بھی پڑھیں: حج2027پیکیجز کی قیمت مقرر،ریگولر حج لاگت 12لاکھ،ڈیجیٹل ادائیگیاں
ان میں مکہ مکرمہ میں 11 ہزار سے زائد اور مدینہ منورہ میں 5 ہزار سے زیادہ معائنے شامل تھے، جبکہ عارضی رہائش گاہوں کے معیار اور قواعد کی پابندی جانچنے کے لیے تقریباً 3 ہزار دورے بھی کیے گئے۔
فیلڈ ٹیموں نے معیار اور لائسنسنگ کی شرائط پر عمل درآمد کے حوالے سے آگاہی کے لیے 3 ہزار 300 سے زائد آگاہی دورے بھی کیے۔
عازمین کی شکایات اور معلومات کے لیے یونیفائیڈ ٹورازم سینٹر کے ہیلپ لائن نمبر 930 سے رابطے کی سہولت بھی فراہم کی گئی۔
سعودی وزارتِ سیاحت نے عازمین کی رہائش کی تقسیم کو بہتر بنانے کے لیے سمارٹ رہائشی سروس بھی متعارف کرائی ہے۔
اس نظام میں عازمین کی آمد کی براہِ راست نگرانی، رہائش گاہوں میں دستیاب گنجائش کے اشارے اور خودکار تصدیق کا نظام شامل ہے، جس کا مقصد انتظار کا وقت کم کرنا اور رہائش کی فراہمی کو زیادہ مؤثر بنانا ہے۔
وزارتِ سیاحت نے حج 2027 کے لیے رہائشی سہولیات کا لائسنس حاصل کرنے کے خواہشمند افراد اور اداروں پر زور دیا ہے کہ وہ مقررہ شرائط جلد مکمل کریں، عمارتوں کی مرمت اور ضروری تیاری بروقت مکمل کریں اور لائسنس کے لیے درخواستیں جمع کرائیں۔
