ریوڈی جنیرو ( پاک ترک نیوز) پرتگال کے عالمی شہرت یافتہ فٹبالر کرسٹیانو رونالڈو نے ریٹائرمنٹ سے متعلق اپنے منصوبوں پر لب کشائی کرتے ہوئے عندیہ دیا ہے کہ رواں سیزن بطور فٹبالر ان کا آخری سیزن ہوسکتا ہے۔
غیر ملکی میڈیا کے مطابق 41 سالہ کرسٹیانو رونالڈو نے اپنی ساتھی جارجینا روڈریگز سے شادی کے بعد ایک انٹرویو میں کہا کہ ’’یہ شاید فٹبال میں میرا آخری سال ہو اور میں ایک شاندار میراث چھوڑنا چاہتا ہوں۔‘‘
رونالڈو کا کہنا تھا کہ انہوں نے فٹبال سے دوری کے بعد کی زندگی کے لیے مکمل منصوبہ بندی کر رکھی ہے اور خود کو مصروف رکھنے کے لیے ان کے پاس بہت سی چیزیں موجود ہیں۔
انہوں نے کہا کہ وہ ریٹائرمنٹ کے بعد زیادہ تفریح، سفر اور پیڈل کھیلنے کے ساتھ ساتھ اپنے کیریئر میں حاصل کی گئی کامیابیوں سے لطف اندوز ہونا چاہتے ہیں۔ رونالڈو کے مطابق یہ تقریباً 25 سال کی قربانیوں پر مشتمل سفر رہا ہے۔
کرسٹیانو رونالڈو پانچ مرتبہ بیلن ڈی اور ایوارڈ اور پانچ مرتبہ چیمپئنز لیگ جیت چکے ہیں۔ وہ انگلینڈ، اسپین، اٹلی اور سعودی عرب میں لیگ ٹائٹلز بھی اپنے نام کرچکے ہیں، جبکہ مینز انٹرنیشنل فٹبال میں سب سے زیادہ گول کرنے والے کھلاڑی ہیں۔
یہ بھی پڑھیں: ایشیا کپ اور ایشین گیمز کیلئے پاکستان ویمنز کرکٹ ٹیم کے اسکواڈز کا اعلان
پرتگال کے کپتان گزشتہ تقریباً چار سال سے سعودی پرو لیگ کی ٹیم النصر کا حصہ ہیں، جہاں ان کے معاہدے میں ابھی ایک سال باقی ہے۔
رونالڈو سے جولائی میں جب پوچھا گیا تھا کہ آیا آئندہ فیفا ورلڈ کپ ان کا آخری ورلڈ کپ ہوگا، تو انہوں نے کہا تھا کہ وہ اپنے خاندان سے مشاورت کے بعد ’’پرسکون ذہن کے ساتھ‘‘ اس بارے میں فیصلہ کریں گے۔
