اوٹاوہ ( پاک ترک نیوز) کینیڈا میں 70 ہزار سے زائد شہریوں نے امریکی سفیر پیٹ ہوئیکسترا کو ملک سے نکالنے کے مطالبے کی حمایت کردی۔
آن لائن پٹیشن میں امریکی سفیر پر کینیڈا کے سیاسی معاملات میں بار بار مداخلت اور دونوں ممالک کے درمیان سفارتی تعلقات کو نقصان پہنچانے کا الزام عائد کیا گیا ہے۔
پٹیشن میں یہ اعتراض بھی اٹھایا گیا ہے کہ امریکی سفیر نے صدر ڈونلڈ ٹرمپ کی جانب سے کینیڈا کو امریکا کی 51ویں ریاست بنانے کی دھمکیوں کو معمول کی سیاسی گفتگو کا حصہ بنا دیا ہے۔
پٹیشن کا آغاز کیلگری کی رہائشی ایک خاتون لیان واکر نے کیا، جن کا کہنا ہے کہ شہریوں کی جانب سے ملنے والی حمایت ان کی توقعات سے کہیں زیادہ ہے۔
یہ بھی پڑھیں: مکہ دفاعی معاہدے میں مزید ممالک کی شمولیت کی خواہش ہے، اردوان
لیان واکر کے مطابق بڑی تعداد میں کینیڈین شہری اس بات پر بے چینی محسوس کرتے ہیں کہ امریکی سفیر صدر ٹرمپ کے مؤقف کو دہراتے ہوئے کینیڈا کی خودمختاری کے حوالے سے بیانات دے رہے ہیں۔
پٹیشن میں امریکی سفیر کو عہدے سے باضابطہ طور پر ہٹانے اور کینیڈا کے اندرونی معاملات میں امریکی سفارتی مداخلت کا جائزہ لینے کے لیے پارلیمانی کمیٹی بنانے کا مطالبہ بھی کیا گیا ہے۔امریکی سفارتخانے نے پٹیشن سے آگاہ ہونے کی تصدیق کی، تاہم مزید تبصرے سے گریز کیا
