ہیں تلخ بہت بندہ مزدور کے اوقات

اسلام آباد ( پاک ترک نیوز) پاکستان سمیت دنیا بھر میں آج مزدوروں کا دن ان کے حقوق کے تحفظ کے عزم کی تجدید کے ساتھ منایا جارہا ہے۔اس سال اس دن کا موضوع ’موسمیاتی تبدیلی کے تناظر میں کام کی جگہ کو محفوظ اور مزدوروں کی صحت کو یقینی بنانا‘ ہے۔
مختلف سرکاری اور نجی تنظیموں نے محنت کشں طبقے کی قربانیوں کو خراج عقیدت پیش کرنے کے لیے کانفرنسز اور سیمینارز سمیت مارچ کے انعقاد کا اہتمام کیا ہے، آج پاکستان میں بھر میں عام تعطیل بھی ہے۔
انیس سو چھیاسی میں امریکہ کے شہر شکاگو کی تحریک نے دنیا بھر کے مزدوروں کو ایک نئے دور میں لا کھڑا کیا، سیکڑوں مزدوروں نے جانیں دے کر دنیا کو ایک نئی آواز دی، پاکستان میں قومی سطح پر یوم مزدور منانے کا انیس سو تہتر سے ہوا۔
ہر سال یکم مئی کو دنیا بھر میں یومِ مزدور اس عزم کے ساتھ منایا جاتا ہے کہ محنت کش طبقے کے حقوق، تحفظ اور فلاح و بہبود کو اُجاگر کیا جائے۔ پاکستان میں بھی یہ دن اہمیت رکھتا ہے، مگر زمینی حقیقت یہ ہے کہ یہاں مزدور آج بھی کئی بنیادی معاشی اور سماجی تحفظات سے محروم ہیں۔ پاکستان کی لیبر مارکیٹ کا سب سے بڑا تضاد یہ ہے کہ معیشت کا بڑا حصہ محنت کشوں پر کھڑا ہے، لیکن وہی طبقہ سب سے زیادہ غیر محفوظ ہے۔