واشنگٹن ( پاک ترک نیوز) امریکہ کے صدر ڈونلڈ ٹرمپ کا کہنا ہے کہ ایران کے ساتھ معاہدے پر آج دستخط ہونے والے ہیں، اور دستخط ہوتے ہی آبنائے ہرمز تمام ممالک کے لیے کھول دی جائے گی۔
صدرٹرمپ نے سوشل میڈیاپرپیغام میں کہا کہ ایران کو اوباما معاہدے کےبرعکس اس معاہدے میں کسی قسم کی رقم نہیں دی جائےگی ۔
صدرٹرمپ کا مزید کہنا تھا کہ ایران اب نہ تو جوہری ہتھیار چاہتا ہے اور نہ ہی اسے خریداری ، تیاری یاکسی اورطریقے سے حاصل کر سکے گا۔براک اوباما کا ایران کےساتھ کیاگیا معاہدہ ایران کے لیے جوہری ہتھیار حاصل کرنے کا ایک آسان، خوبصورت اور ہموار راستہ تھا۔
امریکی صدر نے کہا کہ اگر وہ معاہدہ برقرار رہتا تو ایران چھ سال پہلے ہی جوہری ہتھیار حاصل کر چکا ہوتا، اور غالب امکان ہے کہ اب تک اسے استعمال بھی کر چکا ہوتا۔ایران کے ساتھ میرا معاہدہ اس کے بالکل برعکس اور جوہری ہتھیاروں کے خلاف ایک مضبوط دیوار ہے۔ایران کے ساتھ ہمارے تعلقات ماضی کی حکومتوں کے مقابلے میں بہت مختلف اور کہیں بہتر ہیں۔مناسب وقت پر، جب حالات مکمل طور پر پُرسکون ہوں گے، ہم ایرانی جوہری باقیات کو حاصل کریں گے۔
صدرٹرمپ کا کہنا تھا کہ ایرانی جوہری پروگرام کی باقیات ہمارے ماہرپائلٹوں کی شدیدکاررائیوں کا نتیجہ ہیں جوپہاڑوں کےنیچے موجودہے، اس جوہری مواد کو کم درجے پر لا کر تباہ کر دیا جائے گا، چاہے یہ عمل ایران میں ہو یا امریکہ میں۔
امریکی صدر نے مزید کہا کہ ہم ایران اور پورے مشرقِ وسطیٰ کے ساتھ طویل مدت تک کام کرنے کے منتظر ہیں۔ امید ہے کہ یہ عمل تیزی، آسانی اور خوش اسلوبی سے مکمل ہو جائے گا۔اگر ایسا نہ ہوا تو ہمارے پاس آخری اور فیصلہ کن متبادل بھی موجود ہے، جسے ہم امید کرتے ہیں کہ دوبارہ کبھی استعمال کرنے کی ضرورت پیش نہیں آئے گی۔
