تہران(پاک ترک نیوز ) وفاقی وزیر داخلہ محسن نقوی نے کہا ہے کہ وہ حالیہ علاقائی صورتحال کے تناظر میں پاکستان کے فیلڈ مارشل کا خصوصی خط ایرانی سپریم لیڈر آیت اللہ سید مجتبیٰ حسینی خامنہ ای تک پہنچانے کے لیے تہران آئے ہیں۔
ایرانی وزیر داخلہ اسکندر مومنی سے ملاقات کے موقع پر میڈیا سے گفتگو کرتے ہوئے محسن نقوی نے کہا کہ وہ ایرانی قیادت کے لیے پاکستان کا اہم پیغام لے کر آئے ہیں۔ ان کا کہنا تھا کہ وزیراعظم شہباز شریف نے بھی ایرانی سپریم لیڈر کے نام خصوصی پیغام ارسال کیا ہے جسے وہ ایرانی حکام تک پہنچائیں گے۔
وفاقی وزیر داخلہ نے کہا کہ پاکستان اور ایران کے درمیان برادرانہ تعلقات موجود ہیں اور دونوں ممالک خطے میں امن، استحکام اور باہمی تعاون کے فروغ کے لیے قریبی رابطے میں ہیں۔
محسن نقوی نے اس عزم کا اظہار کیا کہ پاکستان اور ایران باہمی مشاورت اور تعاون کے ذریعے خطے کو درپیش چیلنجز سے نمٹنے کے لیے مشترکہ کوششیں جاری رکھیں گے۔
انہوں نے کہا کہ دونوں ممالک کی قیادت کے درمیان رابطے خطے میں امن و استحکام کے لیے انتہائی اہمیت رکھتے ہیں اور موجودہ صورتحال پر قریبی مشاورت جاری رہے گی۔
