راولپنڈی (پاک ترک نیوز )خیبرپختونخوا اور بلوچستان میں سکیورٹی فورسز اور پولیس کے مشترکہ انٹیلی جنس بیسڈ آپریشنز کے دوران 49 دہشت گرد ہلاک کر دیے گئے۔
آئی ایس پی آر کے مطابق خیبرپختونخوا کے بنوں، شمالی وزیرستان، اورکزئی اور خیبر اضلاع میں کارروائیوں کے دوران بھارتی سرپرستی میں سرگرم فتنہ الخوارج کے 12 دہشت گرد ہلاک ہوئے۔
آپریشنز کے دوران بڑی مقدار میں دھماکہ خیز مواد برآمد کرکے تباہ کیا گیا، جبکہ آئی ای ڈی ڈیٹونیٹنگ ریموٹس، اسلحہ، گولہ بارود اور موٹر سائیکلیں بھی قبضے میں لے لی گئیں۔
آئی ایس پی آر کے مطابق بلوچستان کے مستونگ، مچھ، خضدار اور پنجگور اضلاع میں 10 انٹیلی جنس بیسڈ آپریشنز کیے گئے، جن میں بھارتی سرپرستی میں سرگرم فتنہ الہندوستان کے 37 دہشت گرد ہلاک ہوئے۔
بلوچستان میں کارروائیوں کے دوران بڑی تعداد میں اسلحہ، دھماکہ خیز ڈرمز اور ریموٹ ڈیٹونیشن آلات بھی برآمد کیے گئے۔
آئی ایس پی آر کا کہنا ہے کہ دہشت گردوں کے خلاف سینیٹائزیشن آپریشنز بھی جاری ہیں۔ سکیورٹی فورسز اور قانون نافذ کرنے والے اداروں نے دہشت گردی کے مکمل خاتمے تک کارروائیاں پوری رفتار سے جاری رکھنے کے عزم کا اظہار کیا ہے۔
آئی ایس پی آر کے مطابق عزمِ استحکام کے وژن کے تحت دہشت گرد نیٹ ورکس کے خلاف مہم جاری ہے، سکیورٹی فورسز ملکی سرحدوں کے دفاع، دہشت گردی کے خاتمے اور ملک میں امن و استحکام یقینی بنانے کے لیے پرعزم ہیں۔
