اسلام آباد (پاک ترک نیوز )اپوزیشن کی مشترکہ پارلیمانی پارٹی کا اجلاس محمود خان اچکزئی کی زیرِ صدارت ہوا، جس میں راجا ناصر عباس، بیرسٹر گوہر علی خان، شاہد خٹک، اسد قیصر، سہیل آفریدی اور سلمان اکرم راجا سمیت دیگر رہنماؤں نے شرکت کی۔
اجلاس میں ملک کی سیاسی صورتحال، بانی پی ٹی آئی کی صحت اور سپریم کورٹ کے احکامات پر عملدرآمد سے متعلق امور پر غور کیا گیا۔
اعلامیے کے مطابق اپوزیشن پارلیمانی پارٹی نے بانی پی ٹی آئی کی صحت کے حوالے سے گہری تشویش کا اظہار کرتے ہوئے کہا کہ ان کی صحت اور علاج پر کسی قسم کا سمجھوتہ قبول نہیں کیا جائے گا۔
اعلامیے میں الزام عائد کیا گیا کہ حکومت نے بانی پی ٹی آئی کی صحت کے معاملے پر ڈرامہ رچایا، جبکہ سپریم کورٹ کے احکامات پر عملدرآمد نہ ہونے پر بھی شدید تشویش کا اظہار کیا گیا۔
اپوزیشن کے مطابق حکومت سپریم کورٹ کے فیصلے پر عملدرآمد نہ کرکے توہین عدالت کی مرتکب ہوئی ہے، جس پر کل سپریم کورٹ سے رجوع کرنے اور توہین عدالت کی درخواست دائر کرنے کا فیصلہ کیا گیا ہے۔
وزیراعلیٰ خیبرپختونخوا سہیل آفریدی نے صحافیوں سے گفتگو کرتے ہوئے کہا کہ ہم کل سپریم کورٹ میں توہین عدالت کی درخواست دائر کریں گے۔
اجلاس میں 27 ستمبر کو تحریک انصاف کے بھرپور احتجاج اور لانگ مارچ کا فیصلہ برقرار رکھنے کا اعلان بھی کیا گیا۔ اعلامیے کے مطابق تمام اپوزیشن جماعتوں کو 27 ستمبر کے احتجاج اور لانگ مارچ میں شرکت کی دعوت دی جائے گی۔
اپوزیشن جماعتوں نے پنجاب سمیت ملک بھر میں عوامی رابطہ مہم تیز کرنے پر بھی اتفاق کیا جبکہ آئین، جمہوریت اور قانون کی حکمرانی کے تحفظ کے لیے مشترکہ جدوجہد جاری رکھنے کے عزم کا اظہار کیا۔
اعلامیے میں کہا گیا کہ اپوزیشن جماعتیں باہمی مشاورت اور اتحاد کے ساتھ آئندہ اہم سیاسی و پارلیمانی فیصلے کریں گی۔
اجلاس میں گرینڈ اپوزیشن الائنس کے قیام کی بھرپور تائید اور اسے فعال بنانے پر بھی اتفاق کیا گیا جبکہ مولانا فضل الرحمن اور دیگر اپوزیشن جماعتوں کی الائنس میں شمولیت کا خیرمقدم کیا گیا۔
اپوزیشن کا کہنا ہے کہ اتحاد کے نتیجے میں پارلیمان اور عوام کے درمیان اپوزیشن کی آواز مزید مضبوط ہوگی۔
سہیل آفریدی نے مزید اعلان کیا کہ 27 ستمبر کا لانگ مارچ ہر صورت ہوگا۔
