مدینہ منورہ ( پاک ترک نیوز) سعودی اتحادی افواج کے ترجمان نے مسجد نبوی ﷺ کو بجلی فراہم کرنے والے طیبہ گرڈ سٹیشن پر حوثیوں کا ڈرون حملہ کا الزام عائد کیا ہے ۔
ترجمان کے مطابق طیبہ گرڈ سٹیشن پر حملہ 29 ستمبر صبح 5 بج کر 11 منٹ پر کیا گیا، تحقیقات اور ڈرون ملبے کے تجزیے سے حوثیوں کے ملوث ہونے کی تصدیق ہوئی ہے۔
سعودی اتحاد ترجمان نے بتایا کہ مسجد نبوی ﷺ کو بجلی فراہم کرنے والے شہری انفراسٹرکچر کو نشانہ بنایا گیا، حوثیوں کی کارروائی مقدس مقامات کو نشانہ بنانے کی کوششوں کا تسلسل ہے۔
عالمی خبر رساں ادارے رائٹرز کے مطابق سعودی اتحادی فوج کے ترجمان کرنل المالکی نے میڈیا کو بتایا کہ حوثیوں کے ڈرون حملے میں ایک ٹرانسفارمر بند ہوگیا تاہم بجلی کی فراہمی کے نظام کو مجموعی طور پر نقصان نہیں پہنچا۔
یہ بھی پڑھیں: حکومت کی جانب سے کل ملاقات کا پیغام موصول ہوا، جسے قبول کرلیا، بیرسٹر گوہر
یمن کی سعودی اتحادی فوج کے ترجمان جنرل ترکی المالکی نے مزید کہا کہ جس بجلی گھر کو نشانہ بنایا گیا اس سے مسجد نبوی کو بھی بجلی فراہم کی جاتی ہے جہاں اب متبادل نظام سے بجلی پہنچائی جا رہی ہے۔
ترجمان سعودی اتحادی افواج کا مزید کہنا تھا کہ اتحادی افواج حرمین شریفین کے تحفظ اور زائرین کی سلامتی یقینی بنانے کیلئے پُرعزم ہے۔
