اسلام آباد: (پاک ترک نیوز)پاکستان کے مختلف شہروں میں اچانک زلزلے کے شدید جھٹکے محسوس کیے گئے جس کے باعث شہریوں میں خوف و ہراس پھیل گیا۔
وفاقی دارالحکومت اسلام آباد، راولپنڈی، سوات، شانگلہ اور دیگر علاقوں میں لوگوں نے زلزلے کے جھٹکے محسوس کیے، جس پر شہری گھروں سے باہر نکل آئے۔
کئی علاقوں میں لوگ کلمہ طیبہ کا ورد کرتے اور ایک دوسرے کو محفوظ مقامات کی طرف لے جاتے دکھائی دیے۔
زلزلہ پیما مرکز کے مطابق زلزلے کی شدت 5.8 ریکارڈ کی گئی جبکہ اس کی زیرِ زمین گہرائی 159 کلومیٹر تھی۔ گہرائی زیادہ ہونے کے باعث زلزلے کے جھٹکے طویل مگر نسبتاً کم تباہ کن رہے۔
ابتدائی اطلاعات کے مطابق زلزلے کے نتیجے میں کسی قسم کے جانی یا مالی نقصان کی کوئی اطلاع موصول نہیں ہوئی، تاہم متعلقہ ادارے صورتحال پر مسلسل نظر رکھے ہوئے ہیں۔
زلزلہ پیما حکام کا کہنا ہے کہ اس زلزلے کا مرکز تاجکستان اور چین کے علاقے سنکیانگ کے سرحدی علاقے میں تھا۔
اس سے کچھ دیر قبل انہی علاقوں میں 6.1 شدت کے زلزلے کے جھٹکے بھی ریکارڈ کیے گئے تھے، جن کے اثرات پاکستان کے شمالی علاقوں تک محسوس کیے گئے۔
ماہرین کے مطابق خطے میں حالیہ زلزلے زمینی پلیٹوں کی حرکت کا نتیجہ ہیں اور ایسے جھٹکے آئندہ بھی محسوس کیے جا سکتے ہیں۔
ملک کے مختلف شہروں میں زلزلے کے شدید جھٹکے
