ریاض(پاک ترک نیوز ) سعودی عرب کے دو ہوائی اڈوں پر حملوں میں 3 افراد ہلاک اور 30 سے زائد زخمی ہوگئے۔
سعودی شہری ہوا بازی حکام کے مطابق دارالحکومت ریاض کے شاہ خالد بین الاقوامی ہوائی اڈے پر حملے میں ایک شخص ہلاک اور 2 افراد زخمی ہوئے۔
حکام کے مطابق ابہا ایئرپورٹ کی تنصیبات پر ہونے والے حملے میں 2 افراد ہلاک جبکہ 28 زخمی ہوئے۔
سعودی حکام کا کہنا ہے کہ ایک حملہ منگل جبکہ دوسرا بدھ کے روز کیا گیا۔ حملوں کے بعد ہوائی اڈوں کی سکیورٹی مزید سخت کردی گئی ہے۔
دوسری جانب یمن میں سعودی قیادت میں قائم فوجی اتحاد نے دعویٰ کیا ہے کہ ریاض پر حملے میں استعمال ہونے والا بیلسٹک میزائل لانچر تباہ کردیا گیا ہے۔
سعودی اتحاد کے مطابق ریاض کی جانب داغے گئے میزائل کو بھی راستے میں تباہ کردیا گیا، جبکہ یمن میں حملہ کرنے والے گروہ کے ٹھکانوں کو نشانہ بنایا گیا ہے۔
ادھر امریکی ذرائع کے مطابق شام کی جانب سے یمن میں حوثیوں کے خلاف کارروائی کے لیے فوج بھیجنے پر غور کیا جارہا ہے۔ تاہم اس حوالے سے حتمی فیصلہ سامنے نہیں آیا۔
