لاہور: (پاک ترک نیوز)ہوشیار، خبردار! آئندہ چند روز میں یخ بستہ ہوائیں، بارش اور طوفان، پہاڑی علاقوں سمیت کئی میدانی علاقوں میں برف باری، درجہ حرارت نقطہ انجماد سے نیچے اور پاکستان میں دہائیوں کا ریکارڈ توڑتی سردی‘۔اس نوعیت کے مختلف پیغامات سوشل میڈیا پر گردش کرتے دکھائی دے رہے ہیں۔
ان میں مختلف شہروں میں بارش، ژالہ باری اور برف باری کے دعوے موجود تھے۔
ایسا ہی ایک پیغام سابق وفاقی وزیر عمر سیف کی جانب سے بھی سوشل میڈیا پر شیئر کیا گیا جس میں دعویٰ کیا گیا کہ ’ اگلے 8سے 10 دن میں شدید سردی متوقع ہے جس کی وجہ سائبیریا کا زیادہ دباؤ والا نظام ہو گا۔
‘خیال رہے قطب شمالی سے کچھ اوپر سرد ہوا کے ایک ذخیرے کو پولر ورٹیکس کہتے ہیں۔ یہ زمین کی سطح سے 10 تا 50 کلومیٹر اوپر ہوتا ہے۔ اگر یہ کمزور ہو جائے تو ہوا جنوب کا رخ کر لیتی ہے اور ان علاقوں میں سردی بڑھ جاتی ہے۔
محکمہ موسمیات نے ایسی خبروں کو گمراہ کن قرار دیا ہے۔ بیان میں کہا گیا ہے کہ پولر ورٹیکس تو ہمارے خطے میں نہیں، قطب شمالی میں ہوتا ہے۔ آئندہ دنوں میں شدید سردی کی کوئی لہر متوقع نہیں۔ درجہ حرارت موسم سرما کے معمول کے مطابق ہی رہنے کا امکان ہے۔
تو ایسا محسوس کیوں ہو رہا ہے کہ سردی بڑھ چکی ہے؟ جبکہ ملک کے اکثر علاقے ان دنوں سردی کی لپیٹ میں ہیں۔
محکمہ موسمیات کا کہنا ہے کہ میدانی علاقوں میں دھند کی وجہ سے سورج چھپا رہتا ہے۔ یہی وجہ ہے کہ ہمیں دن زیادہ سرد ملتا ہے۔ البتہ ایک سسٹم بننا شروع ہو رہا ہے۔ امکان ہے کہ 18 جنوری سے ملک کے اکثر علاقوں کو بارشوں کا نظام اپنی لپیٹ میں لے گا۔تاہم اس حوالے سے فیک الرٹ سوشل میڈیا پر پوسٹ کیے جا رہے ہیں۔
