اسلام آباد: (پاک ترک نیوز)وزیر دفاع خواجہ آصف نے بھارت کو للکارتے ہوئے کہا ہے کہ پاکستان کسی بھی وقت جنگ کیلئے تیار ہے۔ ہم نے اپنی تیاری کو گذشتہ سال اللہ تعالیٰ کی مدد سے جنگ مئی میں ثابت کیا۔
خواجہ آصف نے کہا کہ بھارت کو شکست دے کر ہماری عزت میں اضافہ ہوا ہے۔ مودی کو جس طرح پھینٹی پڑی، اُسے پوری دنیا نے دیکھا تھا۔ ناصرف انڈیا بلکہ باہر بھی اُس کی ٹکے کی عزت نہیں رہی۔
نجی ٹی وی کے پروگرام میں عالمی صورتحال پر گفتگو کرتے ہوئے خواجہ آصف کا کہنا تھا کہ جنگ مئی کی شروعات میں ہی مودی نے ناصرف امریکا بلکہ چائنہ کو بھی اپروچ کر لیا تھا۔ اس سے اندازہ لگائیں کہ انڈیا کتنا تار تار ہو چکا تھا، اسے چین کو فون کرنا پڑ گیا تھا کہ ہمیں پاکستان سے بچائو۔
خواجہ آصف نے کہا کہ اللہ تعالیٰ ہمیں تکبر سے بچائے ، اور اپنی مدد شامل حال رکھے، ہم دوبارہ انڈیا کورلائیں گے۔ ایک سوال کا جواب دیتے خواجہ آصف نے کہا کہ پاکستان اور ہندوستان کی سچویشن ایسی ہے، اس میں وینزویلا جیسا آپریشن کامیاب نہیں ہو سکتا۔ وینزویلا کے پاس نہ تو لمبی چوڑی فوج ہے اور نہ ہی اتنا اسلحہ موجود ہے۔ پاک فوج کا لوہا تو پوری دنیا مانتی ہے۔ اس میں کسی دوست کو شک ہے اور نہ کسی دشمن کو۔ حالات بہت تبدیل ہو چکے ہیں۔ بھارت کیلئے پاکستان کیخلاف کچھ بھی کرنا بڑا مشکل ہوگا۔
خواجہ آصف کا کہنا تھا کہ اگر امریکا انسانیت کا دوست ہے تو نیتن یاہو کو اغوا کرے اور کسی عدالت میں مقدمہ چلائے۔ دعا کریں کہ ترکیے نیتن یاہو کو اغواء کرلے اور حساب برابر کردے۔ ہمارے جہاز ٹیسٹ ہوگئے، آرڈر مل رہے ہیں۔ ہو سکتا ہے ہمیں 6 ماہ بعد آئی ایم ایف کی ضرورت ہی نہ پڑے۔
