امریکا نے ویزا کے لیے سیکیورٹی بانڈ کی شرط مزید سخت کر دی

واشنگٹن: (پاک ترک نیوز)ٹرمپ انتظامیہ نے ان ممالک کی فہرست میں مزید سات ملک شامل کر دیے ہیں جن کے شہریوں کو امریکا کا ویزا حاصل کرنے کے لیے 5 ہزار سے 15 ہزار امریکی ڈالر تک سیکیورٹی بانڈ جمع کرانا ہوگا۔ ان میں سے پانچ ممالک افریقہ سے تعلق رکھتے ہیں۔
اس توسیع کے بعد اب مجموعی طور پر 13 ممالک اس فہرست میں شامل ہو چکے ہیں، جن میں سے صرف دو افریقہ سے باہر ہیں۔ اس اقدام کے باعث ان ممالک کے شہریوں کے لیے امریکی ویزا حاصل کرنا مالی طور پر انتہائی مشکل ہو گیا ہے۔امریکی محکمہ خارجہ نے گزشتہ ہفتے خاموشی سے بھوٹان، بوٹسوانا، وسطی افریقی جمہوریہ، گنی، گنی بساؤ، نمیبیا اور ترکمانستان کو اس فہرست میں شامل کیا۔ t
نوٹس کے مطابق یہ فیصلے یکم جنوری سے نافذ العمل ہو چکے ہیں۔یہ اقدام ٹرمپ انتظامیہ کی جانب سے امریکا میں داخلے کے قوانین مزید سخت کرنے کی تازہ کوشش ہے۔
ان اقدامات میں تمام ویزا کے متقاضی ممالک کے شہریوں کے لیے بالمشافہ انٹرویو، کئی سالوں کی سوشل میڈیا سرگرمیوں کی تفصیلات، اور درخواست گزار اور اس کے اہلِ خانہ کی سابقہ سفری اور رہائشی معلومات فراہم کرنا بھی شامل ہے۔
امریکی حکام نے سیکیورٹی بانڈ کے فیصلے کا دفاع کرتے ہوئے کہا ہے کہ یہ اقدام اس بات کو یقینی بنانے میں مؤثر ثابت ہو رہا ہے کہ مخصوص ممالک کے شہری ویزا کی مدت ختم ہونے کے بعد امریکا میں غیر قانونی طور پر قیام نہ کریں۔
حکام کے مطابق بانڈ کی رقم ویزا کی منظوری کی ضمانت نہیں دیتی، تاہم اگر ویزا مسترد ہو جائے یا ویزا حاصل کرنے والا شخص اپنی ویزا شرائط کی مکمل پابندی ثابت کر دے تو یہ رقم واپس کر دی جاتی ہے۔
نئے شامل ہونے والے ممالک ان ممالک کی فہرست میں شامل ہو گئے ہیں جن میں موریتانیہ، ساؤ ٹومے اینڈ پرنسپے، تنزانیہ، گیمبیا، ملاوی اور زیمبیا شامل ہیں، جنہیں گزشتہ سال اگست اور اکتوبر میں اس پالیسی کے تحت شامل کیا گیا تھا۔