اسلام آباد(پاک ترک نیوز)روس کے وزیر داخلہ ولادیمیر کولاکولتسیف وزارتِ داخلہ پہنچے، جہاں وفاقی وزیر داخلہ محسن نقوی سے اہم ملاقات ہوئی۔ دونوں وزرائے داخلہ کے درمیان وفود کی سطح پر بھی مذاکرات ہوئے، جن میں مشترکہ مفادات کے مختلف شعبوں میں باہمی تعاون بڑھانے کے عزم کا اعادہ کیا گیا۔
ملاقات میں منظم جرائم کی روک تھام اور معلومات کے تبادلے کے لیے مفاہمتی یادداشت پر دستخط کرنے کا فیصلہ کیا گیا، جبکہ ملزمان کی حوالگی اور مجرمان کے تبادلے سے متعلق معاہدوں کو حتمی شکل دینے پر بھی اتفاق ہوا۔ دونوں ممالک نے مجرموں کی واپسی سے متعلق معاہدے پر جلد عمل درآمد کا فیصلہ بھی کیا۔
یہ بھی پڑھیں: واشک میں سکیورٹی فورسز کا کامیاب آپریشن، وزیر اعلیٰ بلوچستان کا اظہارِ اطمینان
پاکستان اور روس نے منشیات کی اسمگلنگ کی روک تھام کے لیے پاکستان کی انسدادِ منشیات فورس اور روس کے متعلقہ اداروں کے درمیان تعاون بڑھانے پر اتفاق کیا۔ دونوں ممالک کی وزارتِ داخلہ کے مشترکہ ورکنگ گروپ جلد ایک دوسرے کے ممالک کا دورہ کریں گے۔
ملاقات میں پاکستان سے ہنرمند افرادی قوت روس بھیجنے، سیاحوں اور کاروباری برادری کے لیے ویزے کے حصول میں آسانی پیدا کرنے، سائبر جرائم کی روک تھام اور پاکستان کی قومی پولیس اکیڈمی اور روسی پولیس اکیڈمی کے درمیان تعاون بڑھانے پر بھی تبادلہ خیال کیا گیا۔
وفاقی وزیر داخلہ محسن نقوی نے کہا کہ منظم جرائم کی روک تھام سے متعلق معاہدہ دونوں ممالک کے باہمی تعاون کے فروغ میں اہم سنگ میل ثابت ہوگا۔ ویزے کے طریقہ کار میں آسانی سے دونوں ممالک کے عوام کے درمیان روابط بڑھیں گے۔
محسن نقوی کا کہنا تھا کہ پاکستان سائبر جرائم کی روک تھام کے لیے روس کے تجربات سے استفادہ کرنا چاہتا ہے۔ اس وقت تقریباً 1300 پاکستانی طلبہ روس میں زیرِ تعلیم ہیں اور پاکستان چاہتا ہے کہ مزید طلبہ کو روس میں تعلیم حاصل کرنے کے مواقع میسر آئیں۔
