اسلام آباد: پاکستان اور عالمی مالیاتی فنڈ کے درمیان مالیاتی پروگرام کے جائزوں پر اسٹاف لیول معاہدہ طے پاگیا ہے، جس کے بعد پاکستان کے لیے ایک ارب اکیس کروڑ ڈالر تک کی رقم کے اجرا کی راہ ہموار ہوگئی ہے۔
آئی ایم ایف کے مطابق رقم کا اجرا فنڈ کے ایگزیکٹو بورڈ کی منظوری سے مشروط ہے۔ بورڈ کی منظوری کے بعد پاکستان کو پروگرام کے تحت یہ رقم فراہم کی جاسکے گی۔
سرکاری ذرائع کے مطابق پاکستان کی جانب سے آئی ایم ایف پروگرام پر مکمل عملدرآمد جاری ہے اور معاہدے کے تحت مقررہ اہداف کے حصول کے لیے اقدامات کیے جارہے ہیں۔
ذرائع کا کہنا ہے کہ حکومت نے نجکاری پروگرام کو تیز کردیا ہے، جبکہ بجلی کی تقسیم کار کمپنیوں کے نقصانات میں کمی کے لیے بھی اقدامات جاری ہیں۔
سرکاری ذرائع کے مطابق توانائی کے شعبے میں اصلاحات پر بھی پیش رفت ہورہی ہے اور گیس کے شعبے کا گردشی قرضہ روکنے کے لیے اقدامات کیے جارہے ہیں۔
