اسلام آباد (پاک ترک نیوز )اسلام آباد ہائی کورٹ نے ون کانسٹیٹیوشن ایونیو اپارٹمنٹس کے مالکان کو بے دخل کرنے سے روک دیا ۔عدالت نے حکم دیا ہے کہ تاحکمِ ثانی ون کانسٹیٹیوشن ایونیو اپارٹمنٹس کے مالکان کو بے دخل نہ کیا جائے۔
سماعت کے دوران وکیل سردار تیمور اسلم نے عدالت کو بتایا کہ سی ڈی اے نے بورڈ کی ہدایات کے لیے آج تک مہلت مانگی تھی، ان کے بقول چیئرمین سی ڈی اے بیرونِ ملک تھے جبکہ بورڈ میٹنگ کا معاملہ بعد میں آنا تھا۔
وکیل سردار تیمور اسلم نے مؤقف اختیار کیا کہ ریزیڈنس کمیٹی بنائی گئی تھی جو بلڈنگ چلا رہی تھی، ہماری گزارش صرف اتنی ہے کہ سی ڈی اے کو اس معاملے پر کوئی مسئلہ نہیں ہونا چاہیے۔
اُنہوں نے کہا کہ وزیرِاعظم کی جانب سے بھی ایک کمیٹی قائم کی گئی ہے جس کی سفارشات آنا باقی ہیں اور بعد ازاں کابینہ سے منظوری لی جائے گی، ان کے مطابق پھر یہ معاملہ سی ڈی اے بورڈ میں جائے گا۔
سردار تیمور اسلم نے عدالت میں کہا کہ کیا یہ چاہتے ہیں کہ عید کے دنوں میں قبضہ لیا جائے۔
