اسلام آباد (پاک ترک نیوز) حج 2027 کے لیے سرکاری اور نجی حج اسکیم کی درخواستوں کی وصولی کی تاریخ میں تبدیلی کردی گئی، اب درخواستیں 17 اگست کے بجائے 18 اگست سے وصول کی جائیں گی۔
ذرائع وزارت مذہبی امور کے مطابق حج درخواستوں کی وصولی پہلے آج پیر سے شروع ہونا تھی، تاہم اب درخواستیں منگل 18 اگست سے وصول کی جائیں گی۔
حج 2027 کی درخواستیں اور اخراجات آن لائن اور حبیب بینک کی منتخب برانچوں کے ذریعے جمع کرائے جا سکیں گے۔ درخواستیں ’’پہلے آئیے، پہلے پائیے‘‘ کی بنیاد پر وصول کی جائیں گی اور کوٹہ مکمل ہوتے ہی مزید درخواستوں کی وصولی روک دی جائے گی۔
حج 2027 کے لیے پاکستان کا مجموعی حج کوٹہ ایک لاکھ 79 ہزار 210 مقرر کیا گیا ہے۔ سرکاری حج اسکیم کے لیے 60 فیصد یعنی ایک لاکھ 7 ہزار 526 جبکہ نجی حج اسکیم کے لیے 40 فیصد یعنی 71 ہزار 684 کا کوٹہ مختص ہے۔
ذرائع کے مطابق حج اخراجات دو مساوی اقساط میں وصول کیے جائیں گے۔ درخواست جمع کراتے وقت پہلی قسط کے طور پر نصف حج اخراجات ادا کرنا ہوں گے۔
حج درخواستوں کی وصولی کے لیے اس مرتبہ 16 بینکوں کے بجائے صرف حبیب بینک کو منتخب کیا گیا ہے۔ درخواستیں پاک حج ایپ اور ویب سائٹ کے ذریعے بھی جمع کرائی جاسکیں گی۔
یہ بھی پڑھیں: وزیراعظم شہباز شریف کا مکہ دفاعی معاہدے کی حمایت پر ٹرمپ سے اظہارِ تشکر
عازمین ون لنک، پی ایس آئی ڈی یا کریڈٹ کارڈ کے ذریعے حج اخراجات ادا کرسکیں گے، جبکہ آن لائن چالان حاصل کرکے حج اخراجات نقد بھی جمع کرائے جاسکیں گے۔
بیرون ملک مقیم پاکستانی بھی ڈیجیٹل نظام کے ذریعے حج درخواستیں جمع کراسکیں گے۔
ذرائع کے مطابق سرکاری حج اسکیم کے لیے لانگ اور شارٹ حج پیکیج کی درخواستیں وصول کی جائیں گی۔ سرکاری اسکیم میں 30 ہزار کا کوٹہ شارٹ حج کے لیے جبکہ 77 ہزار 526 کا کوٹہ لانگ حج کے لیے مختص کیا گیا ہے۔
