جنگ آپ شروع کرینگے ،انجام ہمارے ہاتھ میں ہو گا ،اسپیکر پنجاب اسمبلی کی دشمن کو وارننگ

لاہور( پاک ترک نیوز) اسپیکر پنجاب اسمبلی ملک احمد خان کا کہنا ہے میں ایک عام شہری ہوں اور مجھے بارود سے ڈر لگتا ہے، میں اپنے بچوں کے لیے امن اور تعلیم چاہتا ہوں، جنگوں کی تباہی دیکھ کر خوف آتا ہے، اگر لاہور ملبے کے ڈھیر میں بدل جائے تو یہ دیکھنا کسی کو بھی اچھا نہیں لگے گا۔
سپیکر پنجاب اسمبلی نے تقریب سے خطاب میں کہا اصل معرکہ صرف جنگ جیتنا نہیں بلکہ اقوامِ عالم میں پاکستان کا مقام اونچا کرنا ہے، پلوامہ واقعے پر بھارت نے الزامات تو لگائے لیکن آج تک کوئی ثبوت پیش نہیں کر سکا ۔ بھارت کی انٹیلیجنس اور فوج کہاں تھی جو آج تک کوئی ٹھوس شواہد سامنے نہیں لا سکی؟ اگر ثبوت ہیں تو بین الاقوامی اصولوں کے مطابق کسی عالمی ادارے یا ملک کے سامنے لائیں، پاکستان نے ہمیشہ کوشش کی کہ جنگ نہ ہو کیونکہ ایٹمی جنگ کا نقصان جاپان سے کئی گنا زیادہ ہوگا، جنگ آپ شروع کریں گے لیکن انجام ہمارے ہاتھ میں ہوگا، ہم اتنا نقصان کریں گے کہ آپ تصور بھی نہیں کر سکتے۔
ملک احمد خان نے کہا جنگوں میں پہلا قتل سچ کا ہوتا ہے، پاکستانی میڈیا کا شکر گزار ہوں جس نے بھارتی میڈیا کی طرح جھوٹ نہیں پھیلایا، پاکستانی میڈیا نے جنگ کو بڑھاوا نہیں دیا اور ذمہ دارانہ رپورٹنگ کے ذریعے سچ کا ساتھ دیا، پاکستان کی دفاعی صلاحیت دیکھ کر دنیا بھر کے بڑے بڑے جنگی ماہرین حیران و پریشان رہ گئے، روسی ایس 400 اور فرانسیسی رافیل طیاروں کے نظام کو پاکستانی کمان نے جام کر کے سب کو حیران کر دیا۔
اسپیکر پنجاب اسمبلی ملک احمد خان نے کہا آرمی چیف جنرل عاصم منیر نے دلیرانہ فیصلہ کیا، انہوں نے جنگ بھی جیتی اور دنیا میں عزت بھی کمائی۔