لاہور( پاک ترک نیوز) پنجاب ریونیو اتھارٹی نے صوبے بھر میں ریسٹورنٹس، ہوٹلز، کافی شاپس اور فوڈ چینز سے متعلق صارفین کے لیے نئی بلنگ ہدایات جاری کردی ہیں۔
پنجاب ریونیو اتھارٹی کے مطابق ٹیکس نظام میں شفافیت یقینی بنانے کے لیے ریسٹورنٹس اور ہوٹلز کو کچن آرڈر، غیر ادا شدہ بل، پری بل یا عارضی بل جاری کرنے پر پہلے ہی پابندی عائد کی جاچکی ہے۔
نئی ہدایات کے تحت فوڈ چینز، ریسٹورنٹس اور کافی شاپس کو یہ ہدایات اپنے کاروباری مراکز میں نمایاں جگہ پر آویزاں کرنا ہوں گی۔
پی آر اے نے صارفین کو ہدایت کی ہے کہ ریسٹورنٹس، ہوٹلز یا دیگر فوڈ آؤٹ لیٹس پر ادائیگی کے وقت لازمی ڈیجیٹل رسید طلب کریں۔
یہ بھی پڑھیں: اسحاق ڈار اور ترک وزیر خارجہ حاقان فیدان میں ٹیلیفونک رابطہ
صارفین سے کہا گیا ہے کہ جو کاروباری مراکز ڈیجیٹل یا کارڈ کے ذریعے ادائیگی قبول کرنے سے انکار کریں، ان کی شکایت متعلقہ حکام کو کی جائے۔
پی آر اے کے ترجمان کے مطابق ہر ڈیجیٹل رسید پر پی آر اے انوائس نمبر اور کیو آر کوڈ درج ہونا لازمی ہوگا۔
