واشنگٹن : (پاک ترک نیوز)امریکا نے ایران میں بگڑتی ہوئی سیکیورٹی صورتحال کے پیشِ نظر اپنے شہریوں کے لیے ہنگامی سفری انتباہ جاری کر دیا ہے۔
ایران میں قائم امریکی ورچوئل ایمبیسی نے امریکی شہریوں کو مشورہ دیا ہے کہ وہ جلد از جلد ملک چھوڑنے کی منصوبہ بندی کریں اور کسی بھی صورت امریکی حکومت کی براہِ راست مدد پر انحصار نہ کریں۔
ورچوئل ایمبیسی کی جانب سے جاری سیکیورٹی ایڈوائزری میں کہا گیا ہے کہ ایران سے روانگی کے خواہش مند افراد کو فضائی سفر کے دوران پروازوں کی اچانک منسوخی یا طویل تاخیر جیسے مسائل کا سامنا ہو سکتا ہے، اس لیے مسافروں کو ہدایت کی گئی ہے کہ وہ اپنی ایئرلائنز کے ساتھ مسلسل رابطے میں رہیں اور سفری صورتحال پر نظر رکھیں۔
بیان میں یہ بھی واضح کیا گیا ہے کہ جو امریکی شہری فوری طور پر ایران چھوڑنے کی پوزیشن میں نہیں، وہ اپنے موجودہ مقام یا کسی نسبتاً محفوظ جگہ پر قیام کریں اور ممکنہ ہنگامی حالات کے لیے پیشگی تیاری رکھیں۔
اس ضمن میں خوراک، صاف پانی، ادویات اور روزمرہ استعمال کی ضروری اشیا اپنے پاس محفوظ رکھنے کی ہدایت دی گئی ہے۔
امریکی ورچوئل ایمبیسی نے ایران کے مختلف شہروں میں ممکنہ احتجاجی سرگرمیوں اور عوامی مظاہروں کے خدشے کے باعث امریکی شہریوں کو ہجوم، احتجاج اور غیر ضروری نقل و حرکت سے دور رہنے کا مشورہ بھی دیا ہے۔
ایڈوائزری میں مزید کہا گیا ہے کہ امریکی شہری ہمہ وقت چوکس رہیں، مقامی میڈیا اور حالاتِ حاضرہ پر گہری نظر رکھیں اور کسی بھی غیر متوقع صورتحال سے نمٹنے کے لیے موبائل فونز کو چارج رکھیں۔ اس کے ساتھ ساتھ اہلِ خانہ اور قریبی افراد سے مسلسل رابطے میں رہنے کی ہدایت بھی کی گئی ہے تاکہ کسی ہنگامی صورتحال میں فوری اطلاع دی جا سکے۔
امریکا کا ہنگامی الرٹ: ایران میں موجود شہری فوراً نکلنے کی تیاری کریں
