واشنگٹن(پاک ترک نیوز ) امریکی طیارہ انجن ساز کمپنی جی ای ایرو اسپیس کو ہائپرسونک نظام کی آزمائش کے لیے جدید ٹیسٹ پلیٹ فارم تیار کرنے کا نیا معاہدہ مل گیا ہے۔
کمپنی نے امریکی ڈیفنس انوویشن یونٹ، ڈی آئی یو سے یہ معاہدہ ہائپرسونک اینڈ ہائی کیڈنس ایئربورن ٹیسٹنگ کیپابیلیٹیز، یعنی ہائپ کیٹ پروگرام کے تحت حاصل کیا ہے۔
منصوبے کا مقصد ہائپرسونک پروازوں کی آزمائش کو زیادہ تیز، بار بار اور مؤثر بنانا ہے۔ ہائپرسونک نظام ایسے طیاروں یا ہتھیاروں کو کہا جاتا ہے جو میک 5، یعنی آواز کی رفتار سے پانچ گنا سے زیادہ رفتار پر سفر کرتے ہیں۔
ہائپرسونک ٹیکنالوجی کی تیاری میں ایک بڑا چیلنج حقیقی پرواز کے دوران ٹیسٹنگ اور مطلوبہ ڈیٹا کا حصول ہے۔ نئے پلیٹ فارم کے ذریعے مختلف ہائپرسونک ٹیکنالوجیز کی پرواز کے دوران آزمائش اور مستقبل کے نظاموں کے لیے اہم ڈیٹا جمع کرنے کی کوشش کی جائے گی۔
یہ منصوبہ 2023 میں شروع ہونے والے کام کا اگلا مرحلہ ہے، جب جی ای ایرو اسپیس کو ابتدائی طور پر تصوراتی ڈیزائن اور پلیٹ فارم کی تیاری کے لیے فنڈنگ دی گئی تھی۔
نئے مرحلے میں کمپنی ایک مشترکہ بوسٹر اور کروز طرز کا نظام ڈیزائن اور تیار کرے گی۔ دونوں حصے مل کر ایک مکمل آل اَپ راؤنڈ ٹیسٹ بیڈ کے طور پر کام کریں گے، جسے ہائپرسونک پرواز کی آزمائش کے لیے استعمال کیا جاسکے گا۔
اس پلیٹ فارم کا مقصد یہ ہے کہ ہر نئی ہائپرسونک ٹیکنالوجی کے لیے الگ مخصوص ٹیسٹ گاڑی تیار کرنے کی ضرورت کم ہو۔ اس طرح تجربات سے حاصل ہونے والے حقیقی ڈیٹا کے حصول میں وقت اور اخراجات کم کیے جاسکتے ہیں۔
جی ای ایرو اسپیس کے ایڈیسن ورکس کے نائب صدر اور جنرل منیجر اسٹیو رسل کے مطابق ہائپرسونک ٹیسٹنگ کے عمل کو تیز کرنا آئندہ نسل کی جدید دفاعی صلاحیتیں تیار کرنے کے لیے انتہائی اہم ہے۔
