ابوظہبی(پاک ترک نیوز ) متحدہ عرب امارات نے اپنے ویزا آن ارائیول پروگرام کو مزید وسعت دیتے ہوئے چھ نئے ممالک کے شہریوں اور ان کے اہلِ خانہ کو اس سہولت میں شامل کر لیا۔
نئے فیصلے کے تحت انڈونیشیا، ویتنام، تھائی لینڈ، فلپائن، کینیا اور جنوبی افریقہ کے عام پاسپورٹ رکھنے والے شہری، اگر ان کے پاس امریکہ، یورپی یونین کے کسی رکن ملک، برطانیہ، سنگاپور، جاپان، جنوبی کوریا، آسٹریلیا، نیوزی لینڈ یا کینیڈا کا کارآمد رہائشی پرمٹ موجود ہو، تو وہ یو اے ای پہنچنے پر 14 روزہ یا 60 روزہ ویزا آن ارائیول حاصل کر سکیں گے۔ یہ سہولت ان کے ساتھ سفر کرنے والے اہلِ خانہ پر بھی لاگو ہوگی۔
یو اے ای کی وزارتِ خارجہ کے مطابق اس اقدام کا مقصد دوست ممالک کے ساتھ دوطرفہ تعلقات کو مزید مضبوط بنانا، اقتصادی، ثقافتی اور عوامی روابط کو فروغ دینا اور دنیا بھر کے مسافروں کے لیے سفر کو مزید آسان بنانا ہے۔
یہ بھی پڑھیں: یو اے ای سینٹرل بینک کاغیر ملکی بینک کی برانچ کو 2 کروڑ درہم جرمانہ
وزارت نے کہا کہ اس فیصلے سے ان ممالک کے شہریوں کو یو اے ای کی منفرد ثقافت، عالمی معیار کی سیاحتی سہولیات، مضبوط معیشت، کاروباری مواقع اور جدید انفراسٹرکچر سے استفادہ کرنے کا موقع ملے گا۔ وزارت نے اس عزم کا بھی اظہار کیا کہ متعلقہ قومی اداروں کے ساتھ مل کر سفری اور قونصلر خدمات کو مزید مؤثر بنایا جائے گا تاکہ یو اے ای کاروبار، سرمایہ کاری، انٹرپرینیورشپ اور باصلاحیت افراد کے لیے عالمی سطح پر ایک پرکشش مرکز بنا رہے۔
دوسری جانب فیڈرل اتھارٹی برائے شناخت، شہریت، کسٹمز اور پورٹس سیکیورٹی کا کہنا ہے کہ نئی ترامیم یو اے ای کے ویزا نظام کو عالمی معیار کے مطابق بنانے اور زیادہ سے زیادہ افراد کو سہولت فراہم کرنے کی کوششوں کا حصہ ہیں۔
اتھارٹی کے مطابق 14 روزہ ویزا ایک مرتبہ مزید بڑھایا جا سکتا ہے، جبکہ 60 روزہ ویزا صرف ایک بار قیام کے لیے ہوگا اور اس میں توسیع کی اجازت نہیں ہوگی۔ ویزے کی مدت ختم ہونے پر ملک چھوڑنا لازمی ہوگا، بصورت دیگر 50 درہم یومیہ جرمانہ عائد کیا جائے گا۔
حکام کے مطابق 14 روزہ ویزا کی مجموعی فیس 100 درہم جبکہ 60 روزہ ویزا کی مجموعی فیس 250 درہم مقرر کی گئی ہے۔
