انقرہ ( پاک ترک نیوز) ترک صدر رجب طیب اردوان کا امریکی صدر ڈونلڈ ٹرمپ سے ٹیلی فونک رابطہ ہوا، جس میں دونوں رہنماؤں نے دوطرفہ تعلقات، ایران اور غزہ میں جاری جنگوں سمیت پاکستان، سعودی عرب اور ترکیہ کے درمیان ہونے والے دفاعی معاہدے پر تبادلہ خیال کیا۔
صدر اردوان نے امریکی صدر پر زور دیا کہ ایران کے ساتھ بات چیت کا سلسلہ جاری رکھنا انتہائی اہم ہے، کشیدگی کے خاتمے کے لیے سفارت کاری سے بھرپور فائدہ اٹھایا جائے۔
ترک صدر نے کہا کہ ترکیہ ایران اور امریکا کے درمیان امن کوششوں میں اپنا کردار ادا کرنے کے لیے تیار ہے اور مذاکرات کے ذریعے مسائل کے حل کی حمایت جاری رکھے گا۔
صدر اردوان نے غزہ کی صورتحال پر بھی تشویش کا اظہار کرتے ہوئے کہا کہ اسرائیل ایسے وقت میں فلسطینیوں پر حملے تیز کر رہا ہے جب غزہ امن منصوبے کے دوسرے مرحلے پر عمل درآمد ہونا تھا۔
یہ بھی پڑھیں: امریکہ اور ایران میں جنگ بندی میں 60 روزہ توسیع،العربیہ کا دعویٰ
دونوں رہنماؤں نے خطے میں امن و استحکام کے لیے سفارتی کوششوں اور باہمی تعاون کو جاری رکھنے کی اہمیت پر بھی بات چیت کی۔
