مری: (پاک ترک نیوز) ہم سب کو وہ المناک واقعہ یاد ہے جب چند سال پہلے مری میں شدید برفباری کے دوران سیاح گاڑیوں میں پھنس گئے تھے اور ہیٹر کے غلط استعمال کے باعث قیمتی جانیں ضائع ہو گئی تھیں۔ آج ایک بار پھر حالات ویسے ہی بنتے دکھائی دے رہے ہیں۔
مری میں صورتحال انتہائی حساس ہے۔ شدید برفانی طوفان کے باعث حدِ نگاہ تقریباً ختم ہو چکی ہے، اسی لیے مری کی جانب مزید گاڑیوں کے داخلے پر پابندی عائد کر دی گئی ہے۔
انتظامیہ اور پولیس واضح طور پر اپیل کر رہی ہے کہ سیاح مری کا سفر مؤخر کر دیں۔ ملکہ کوہسار مری ایک بار پھر قدرت کے شدید امتحان سے گزر رہی ہے۔ مری میں اس وقت شدید برفباری اور غیر معمولی برفانی طوفان جاری ہے، جس نے سب کچھ تہس نہس کرکے رکھا دیا ہے۔ ضلعی انتظامیہ، پولیس اور ریسکیو ادارے مکمل طور پر متحرک ہیں۔
ہیوی مشینری کے ذریعے سڑکوں سے برف ہٹانے کا آپریشن جاری ہے۔ انتظامیہ کی اولین ترجیح اندرون علاقوں کی شاہراہیں کھولنا اور مری میں پھنسی ہزاروں گاڑیوں کو بحفاظت نکالنا ہے۔
اگر آپ مری میں موجود ہیں تو گاڑیوں میں ہیٹر استعمال کرتے وقت آکسیجن کا خاص خیال رکھیں، کھڑی گاڑی میں ہیٹر ہرگز نہ چلائیں۔ غیر ضروری سفر سے گریز کریں، انتظامیہ کی ہدایات پر عمل کریں اور کسی بھی ایمرجنسی میں پولیس یا ریسکیو اداروں سے فوری رابطہ کریں۔
یاد رکھیں! تفریح بعد میں بھی ہو سکتی ہے، زندگی نہیں۔ آپ کی جان، آپ کے خاندان کی سب سے قیمتی امانت ہے۔
