ماسکو ( پاک ترک نیوز) اسرائیلی وزیراعظم نیتن یاہو اور روسی صدر ولادیمیر پیوٹن کے درمیان ٹیلی فون پر رابطہ ہوا ہے۔
روسی صدر پیوٹن اور نیتن یاہو نے مشرق وسطیٰ کی صورتحال اور صدر ٹرمپ کے امن منصوبے پر تفصیلی بات چیت کی۔
دونوں رہنماؤں نے ایرانی جوہری پروگرام سے متعلق مسائل کا بات چیت سے حل نکالنے میں دلچسپی کا اظہار کیا۔روسی صدر پیوٹن اور نیتن یاہو کے درمیان شام میں مزید استحکام پر بھی بات چیت ہوئی۔
شمالی کوریا کے سربراہ کم جونگ اُن نے روسی صدر ولادیمیر پیوٹن کو سالگرہ کی مبارکباد پیش کرتے ہوئے دونوں ممالک کے درمیان ازلی دوستی اور اتحادی تعلقات کے تسلسل پر زور دیا۔
کم جونگ اُن نے اپنے پیغام میں کہا کہ مجھے یقین ہے کہ دونوں ممالک کے درمیان اتحاد پر مبنی تعلقات جو اس وقت اپنے عروج پر ہیں مستقبل میں بھی ہمارے باہمی دوستانہ اور رفیقانہ تعلقات کی بدولت مضبوطی سے قائم رہیں گے۔
شمالی کوریا کے سربراہ نے کہا کہ تعلقات دو طرفہ ترقی کے ساتھ ساتھ ایک منصفانہ اور کثیر قطبی عالمی نظام کے قیام میں اہم کردار ادا کریں گے۔
انہوں نے مزید کہا کہ شمالی کوریا روسی عوام کی قومی خود مختاری، علاقائی سالمیت اور سلامتی کے تحفظ کی منصفانہ جدوجہد کی مکمل حمایت کرے گا اور دونوں ممالک کے درمیان بین الریاستی معاہدے پر عملدرآمد کو برادرانہ فریضہ سمجھتے ہوئے آئندہ بھی وفاداری سے نبھائے گا۔
ان کا کہنا تھا کہ پیونگ یانگ اور ماسکو ہمیشہ ایک ساتھ کھڑے رہیں گے اور ہماری دوستی لازوال رہے گی۔
یاد رہے کہ روسی صدر ولادیمیر پیوٹن 7 اکتوبر کو اپنی 73ویں سالگرہ منا رہے ہیں۔ کریملن کے ترجمان دمتری پیسکوف کے مطابق اس موقع پر صدر پیوٹن کو کئی عالمی رہنماؤں کی جانب سے ٹیلیفون کالز موصول ہوں گی۔
روسی صدر پیوٹن اور اسرائیلی وزیراعظم نیتن یاہو کے درمیان ٹیلی فونک رابطہ
