دبئی : (پاک ترک نیوز)پاکستان نے ٹی 20 ورلڈکپ 2026 میں بھارت کے خلاف میچ نہ کھیلنے کا فیصلہ کیا ہے، جس پر انٹرنیشنل کرکٹ کونسل (آئی سی سی) نے تشویش اور تحفظات کا اظہار کیا ہے۔
پاکستان کی حکومت نے اعلان کیا ہے کہ قومی ٹیم ورلڈکپ میں حصہ لے گی، تاہم بھارت کے خلاف 15 فروری کو شیڈول میچ میں حصہ نہیں لے گی۔
یہ اقدام بنگلہ دیش کے ساتھ اظہار یکجہتی اور احتجاج کی صورت میں کیا گیا ہے۔
آئی سی سی کے ترجمان نے کہا کہ پاکستان کے اس فیصلے سے عالمی کرکٹ پر اثر پڑ سکتا ہے اور یہ عالمی سطح کے کھیل اور شائقین کے مفاد میں نہیں ہے۔
انہوں نے کہا کہ ہم پی سی بی کے آفیشل بیان کا انتظار کر رہے ہیں اور امید ہے کہ پاکستان کرکٹ بورڈ اس کے ممکنہ مضمرات پر غور کرے گا۔
خیال رہے کہ وزیراعظم شہباز شریف سے چیئرمین پی سی بی محسن نقوی نے بھی ملاقات کی، جس میں ٹی 20 ورلڈکپ میں پاکستان کی شرکت اور بھارت کے خلاف میچ نہ کھیلنے کے فیصلے پر تبادلہ خیال کیا گیاتھا۔
حکومت نے واضح کیا کہ دیگر تمام میچز میں پاکستان اپنی ٹیم کو کھیلنے دے گا اور ٹیم کی عالمی کرکٹ مقابلوں میں موجودگی برقرار رہے گی۔ یہ فیصلہ ایک حساس سیاسی اور کھیلوں کے نقطہ نظر سے کیا گیا ہے، جس کا مقصد کرکٹ شائقین اور بین الاقوامی کمیونٹی کو آگاہ کرنا ہے۔
ٹی20 ورلڈ کپ: پاکستان کا انڈیا کیساتھ نہ کھیلنے کا فیصلہ، آئی سی سی کا ردعمل آگیا
