خلائی دنیا میں اسپیس ایکس ایک اور بڑا ریکارڈ بنانے جا رہی ہے۔ کمپنی کا فالکن نائن راکٹ 2026 میں اپنی 100ویں پرواز مکمل کرنے والا ہے، جبکہ اسی مشن کے دوران راکٹ کے پہلے مرحلے کی 37ویں پرواز بھی ہوگی۔
اسپیس ایکس کا فالکن نائن راکٹ آج امریکی ریاست فلوریڈا کے کیپ کیناویرل اسپیس فورس اسٹیشن سے لانچ کیا جائے گا۔راکٹ کے ذریعے 29 اسٹارلنک سیٹلائٹس خلا میں بھیجے جائیں گے۔
لانچ کے لیے چار گھنٹے کی ونڈو رکھی گئی ہے، جو امریکی وقت کے مطابق رات ایک بج کر 49 منٹ پر شروع ہوگی۔
راکٹ کا پہلا مرحلہ لانچ کے تقریباً ساڑھے آٹھ منٹ بعد زمین پر واپس آئے گا۔اسے بحرِ اوقیانوس میں موجود اسپیس ایکس کے ڈرون شپ اے شارٹ فال آف گریویٹاس پر اتارا جائے گا۔
دوسری جانب راکٹ کا اوپری مرحلہ 29 اسٹارلنک سیٹلائٹس کو زمین کے مدار میں پہنچائے گا اور لانچ کے تقریباً 61 منٹ بعد سیٹلائٹس کو خلا میں چھوڑ دیا جائے گا۔
یہ مشن فالکن نائن کی 2026 میں 100ویں پرواز ہوگی، جبکہ راکٹ کے پہلے مرحلے کے لیے یہ ریکارڈ ساز 37ویں مشن ہوگا۔
اس راکٹ کے پہلے مرحلے کا کوڈ نام بی 1067 ہے، جو اب تک 36 مرتبہ پرواز کر چکا ہے۔اس کے ساتھ اسپیس ایکس کے کم از کم پانچ مزید فالکن نائن بوسٹرز بھی 30 یا اس سے زیادہ پروازیں مکمل کر چکے ہیں۔
اسپیس ایکس کے مطابق گزشتہ سال فالکن نائن نے 165 مشنز مکمل کیے، اور تمام مشنز کامیاب رہے۔
