ماسکو ( پاک ترک نیوز) روس نے ایک بار پھر دنیا کو اپنی طاقت دکھا دی۔۔ نئے خطرناک ترین ایٹمی میزائل سارمات کا کامیاب تجربہ کیا گیا ، یہ ایسا میزائل ہے جسے مغرب شیطان ٹو بھی کہتا ہے ، بین البراعظمی بیلسٹک میزائل کے تجربے کی ویڈیو بھی جاری کر دی گئی۔
روس کے مطابق اس میزائل کا لانچ وزن 10 ٹن ہے، جو اس نوعیت کے میزائلوں میں سب سے زیادہ شمار ہوتا ہے۔ میزائل سارمات 35 ہزار کلومیٹر تک مار کر سکتا ہے اور ایک ساتھ کئی جوہری وارہیڈ لے جانے کی صلاحیت رکھتا ہے۔
یہ میزائل گلائیڈر کو بھی لے جا کر فائر کر سکتا ہے۔یہ گلائیڈر بلندی تک لے جائے جاتے ہیں اور پھر زمین کی طرف حرکت کرتے ہیں۔ رفتار بڑھاتے ہوئے آواز کی رفتار حاصل کرنے کے بعد یہ ہدف کی جانب بڑھتے ہیں اور انھیں روکنا انتہائی دشوار ہوتا ہے۔
یہ میزائل راستہ بدلنے اور دشمن کے دفاعی نظام کو دھوکہ دینے کی صلاحیت بھی رکھتا ہے۔۔۔ اسی لیے اسے دنیا کے خطرناک ترین ہتھیاروں میں شمار کیا جا رہا ہے۔
روسی صدر پوٹن کو دی گئی رپورٹ میں کہا گیا سارمات نظام سے لیس پہلا میزائل رجمنٹ 2026 کے اختتام تک مکمل جنگی تیاری کی حالت میں آ جائے گا۔
یہ نئے بھاری بین البراعظمی بیلسٹک میزائل کا دوسرا کامیاب تجربہ ہے۔ اس کی پہلی لانچ 2022 میں کی گئی تھی۔۔2024 میں، پلستسک خلائی اڈے سے اس میزائل کی ممکنہ لانچ کی کوشش کے دوران ایک حادثہ پیش آیا تھا۔
ماہرین کا کہنا ہے کہ ایسے میزائل صرف جنگ کے لیے نہیں بلکہ دنیا پر دباؤ ڈالنے اور خوف پیدا کرنے کے لیے بھی استعمال ہوتے ہیں. روس کے اس نئے میزائل تجربے نے ایک بار پھر دنیا میں ایٹمی خطرات اور بڑی طاقتوں کی کشمکش کو تیز کر دیا ہے۔
