پی ایس ایل میں دو نئی ٹیموں کا اضافہ، حیدرآباد اور سیالکوٹ کی شمولیت کنفر م

اسلام آباد: (پاک ترک نیوز)پاکستان سپر لیگ (پی ایس ایل) کے سیزن 11 کے لیے دو نئی فرنچائز ٹیموں کی نیلامی اسلام آباد کے جناح کنونشن سینٹر میں مکمل ہو گئی، جس کے بعد حیدرآباد اور سیالکوٹ کو باضابطہ طور پر نئی ٹیموں کے شہروں کے طور پر کنفرم کر دیا گیا ہے۔
اس نیلامی کو پی ایس ایل کی تاریخ کی سب سے مہنگی اور سنسنی خیز بولی قرار دیا جا رہا ہے۔ساتویں ٹیم کے حقوق ایف کے ایس (FKS) نے ریکارڈ 1 ارب 75 کروڑ روپے میں حاصل کیے۔
نیلامی کے بعد ایف کے ایس کے مالک فواد سرور نے اعلان کیا کہ ان کی ٹیم حیدرآباد کی نمائندگی کرے گی۔ ساتویں ٹیم کی بولی کا آغاز ایک ارب 10 کروڑ روپے سے ہوا تھا، جو مختلف کمپنیوں کے درمیان سخت مقابلے کے بعد 1 ارب 75 کروڑ روپے تک جا پہنچی۔
آٹھویں ٹیم کے لیے ہونے والی نیلامی اس سے بھی زیادہ سنسنی خیز رہی، جہاں او زیڈ ڈویلپرز (OZ Developers) نے 1 ارب 85 کروڑ روپے کی ریکارڈ بولی لگا کر فرنچائز حاصل کی۔
او زیڈ ڈویلپرز کے مالک حمزہ مجید نے اعلان کیا کہ ان کی ٹیم سیالکوٹ کی نمائندگی کرے گی۔ آٹھویں ٹیم کی بنیادی قیمت ایک ارب 70 کروڑ روپے مقرر کی گئی تھی، تاہم مختلف بولیوں کے بعد یہ رقم پی ایس ایل کی تاریخ کی بلند ترین سطح تک پہنچ گئی۔
پاکستان کرکٹ بورڈ (پی سی بی) کے مطابق مجموعی طور پر 10 کمپنیوں نے نیلامی میں حصہ لیا، جن میں آئی ٹی، ٹیلی کام، کنسٹرکشن اور توانائی کے شعبوں سے تعلق رکھنے والی بڑی کمپنیاں شامل تھیں۔
پی سی بی نے واضح کیا کہ کامیاب بولی دہندگان کو پی سی بی کی منظور شدہ فہرست میں شامل شہروں میں سے اپنی ہوم سٹی منتخب کرنے کا اختیار دیا گیا تھا۔پی ایس ایل میں حیدرآباد اور سیالکوٹ کی شمولیت کو لیگ کی توسیع، مقبولیت اور کمرشل ویلیو میں ایک اہم سنگِ میل قرار دیا جا رہا ہے، جس سے شائقینِ کرکٹ کو مزید سنسنی خیز مقابلے دیکھنے کو ملیں گے۔