اسلام آباد ( پاک ترک نیوز) وزیراعظم شہباز شریف نے سعودی عرب پر حوثی ملیشیا کے مسلسل حملوں کی شدید مذمت کرتے ہوئے حملے فوری طور پر بند کرنے کا مطالبہ کیا ہے۔ وزیراعظم نے ریاض کے کنگ خالد بین الاقوامی ہوائی اڈے اور ابہا ہوائی اڈے کو نشانہ بنانے پر بھی گہری تشویش کا اظہار کیا۔وزیراعظم شہباز شریف نے کہا کہ ان حملوں کے نتیجے میں شہری جاں بحق اور زخمی ہوئے، شہری آبادی اور اہم تنصیبات کو نشانہ بنانا قابل مذمت ہے۔وزیراعظم نے سعودی افواج اور اتحادی فورسز کی جانب سے بیلسٹک میزائلوں کو روکنے کے لیے کی جانے والی کارروائیوں کو سراہتے ہوئے کہا کہ پاکستان سعودی عرب کی قیادت اور عوام کے ساتھ مضبوطی سے کھڑا ہے۔
شہباز شریف کا کہنا تھا کہ پاکستان مکہ مکرمہ مشترکہ دفاعی معاہدے کے تحت سعودی عرب کی سلامتی کے تحفظ کے عزم پر قائم ہے۔ سعودی عرب کی خودمختاری، علاقائی سالمیت اور سلامتی کے تحفظ کے لیے پاکستان کا عزم غیر متزلزل ہے۔وزیراعظم نے حوثی ملیشیا پر زور دیا کہ وہ سعودی عرب پر حملے فوری طور پر بند کرے اور خطے میں امن و استحکام کو نقصان پہنچانے والے اقدامات سے گریز کرے۔پاکستان نے ایک بار پھر سعودی عرب کے ساتھ یکجہتی کا اظہار کرتے ہوئے اس کی سلامتی اور علاقائی سالمیت کے تحفظ کے لیے اپنے عزم کا اعادہ کیا ہے۔
