اسلام آباد( پاک ترک نیوز) وزیراعظم شہباز شریف کی زیرِ صدارت ایف بی آر اصلاحات پر ہفتہ وار جائزہ اجلاس ہوا، جس میں پی آر اے ایل کی تنظیمِ نو، ٹیکس نظام کی ڈیجیٹلائزیشن اور اسمگلنگ کے خلاف اقدامات پر بریفنگ دی گئی۔وزیراعظم نے ایف بی آر اصلاحات مقررہ مدت میں مکمل کرنے اور اصلاحاتی عمل کا تھرڈ پارٹی آڈٹ یقینی بنانے کی ہدایت کی۔ شہباز شریف نے کہا کہ ڈیجیٹلائزیشن، پیداوار کی نگرانی اور خودکار نظام ایف بی آر اصلاحات کے اہم ستون ہیں۔
اجلاس کو بتایا گیا کہ IRIS 3.0، نئے ٹیکس آپریٹنگ ماڈل اور سینٹرل ڈیٹا ہب پر مرحلہ وار کام جاری ہے، جبکہ ٹیکس وصولی بہتر بنانے کے لیے مصنوعی ذہانت اور مشین لرننگ کے استعمال پر بھی کام ہو رہا ہے۔بریفنگ کے مطابق جنوری سے جون 2026 کے دوران فیس لیس کسٹمز اسیسمنٹ سے فی گڈز ڈیکلریشن اوسط ریونیو میں 12 فیصد اضافہ ہوا، جبکہ 280 گڈز ایویلیویٹرز کی بھرتی کا عمل آخری مراحل میں ہے۔
یہ بھی پڑھیں: مشترکہ دفاعی معاہدے سے تینوں ممالک مزید قریب آئے،وزیراعظم
ڈیجیٹل انوائسنگ کے ذریعے جولائی 2026 میں 2.5 ٹریلین روپے سے زائد کی ٹرانزیکشنز ہوئیں، جبکہ دسمبر تک 4 ٹریلین روپے کی ٹرانزیکشنز کا ہدف مقرر کیا گیا ہے۔وزیراعظم نے ٹیکس چوری، اسمگلنگ اور غیر قانونی کاروبار کے خلاف کارروائیاں مزید تیز کرنے اور اصلاحات پر عملدرآمد مؤثر بنانے کی ہدایت بھی کی۔
