لندن ( پاک ترک نیوز) صدرِ مملکت آصف علی زرداری برطانیہ کے دارالحکومت لندن پہنچ گئے ہیں، جہاں وہ تقریباً دو ہفتے قیام کریں گے۔ ذرائع کے مطابق صدر زرداری کے دورۂ برطانیہ کے دوران مختلف میڈیکل چیک اپس بھی متوقع ہیں۔
ذرائع کا کہنا ہے کہ صدر آصف علی زرداری لندن میں قیام کے دوران کسی سیاسی سرگرمی میں حصہ نہیں لیں گے، تاہم ان سے مختلف وفود کی ملاقاتیں متوقع ہیں۔ صدر زرداری کے ہمراہ سینیٹر سلیم مانڈوی والا اور ان کے ذاتی معالج ڈاکٹر عاصم حسین بھی لندن پہنچے ہیں۔ ذرائع کے مطابق صدر آصف علی زرداری تقریباً چھ برس بعد برطانیہ کے دورے پر آئے ہیں۔
یہ بھی پڑھیں: ٹرمپ کی ایران کو سخت جواب دینے کی دھمکی
ذرائع کے مطابق چیئرمین پاکستان پیپلز پارٹی بلاول بھٹو زرداری کی بھی آئندہ چند روز میں لندن آمد متوقع ہے۔ تاہم ان کے دورے اور صدر زرداری سے ملاقات کے حوالے سے مزید تفصیلات سامنے نہیں آئی ہیں۔ صدر زرداری کے لندن قیام کے دوران طبی معائنے سمیت معمول کی مصروفیات جاری رہنے کا امکان ہے، جبکہ مختلف وفود سے ملاقاتیں بھی متوقع ہیں۔
