اسلام آباد ( پاک ترک نیوز) وزیراعظم شہباز شریف نے پمز اسپتال کی نرسری میں آتشزدگی کے افسوسناک واقعے پر ایکشن لیتے ہوئے وفاقی سیکریٹری صحت اسلم غفوری کو معطل کرکے عہدے سے ہٹا دیا۔وزیراعظم شہباز شریف کی زیر صدارت پمز آتشزدگی کے واقعے سے متعلق اہم اجلاس ہوا، جس میں وزیراعظم نے متعلقہ افسران پر برہمی کا اظہار کیا اور واقعے کے ذمہ داروں کا تعین کرکے کارروائی کی ہدایت کی۔
پمز نرسری آتشزدگی کی تحقیقات کے لیے انکوائری کمیٹی بھی تشکیل دے دی گئی ہے۔ سابق سیکریٹری داخلہ شاہد خان کو کمیٹی کا سربراہ مقرر کیا گیا ہے، جبکہ سیکریٹری اسٹیبلشمنٹ ڈاکٹر بیرسٹر نویل اعوان بھی کمیٹی کے رکن ہوں گے۔وزیراعظم شہباز شریف نے کہا کہ پمز اسپتال میں پیش آنے والے اس اندوہناک واقعے پر دل رنجیدہ ہے، بچوں کے ساتھ ایسی صورتحال ناقابلِ تلافی ہے۔
یہ بھی پڑھیں: پمز نرسری آتشزدگی: وزیراعظم کا نوٹس، فوری تحقیقات کا حکم
وزیراعظم نے ہدایت کی کہ واقعے کے تمام پہلوؤں کا جائزہ لیا جائے اور غفلت یا کوتاہی کے ذمہ دار عناصر کے خلاف قانون کے مطابق کارروائی عمل میں لائی جائے۔
