لندن ( پاک ترک نیوز) لارڈز ٹیسٹ کے دوران عمران خان کے بیٹوں کے انٹرویو پر پیدا ہونے والے تنازع کے چند روز بعد پاکستانی کرکٹ ٹیم کی اس ہفتے برطانوی بادشاہ کنگ چارلس سے ملاقات ہوگی۔
بکنگھم پیلس کے مطابق کنگ چارلس، جو دولتِ مشترکہ کے سربراہ بھی ہیں، انگلینڈ میں دوسرے اور تیسرے ٹیسٹ کے درمیان وقفے کے دوران پاکستانی ٹیم سے ملاقات کریں گے۔ملاقات کلیرنس ہاؤس کے باغات میں ہوگی اور کنگ چارلس پاکستانی ٹیم کے ساتھ تقریباً 15 منٹ گزاریں گے۔یہ ملاقات سیریز شروع ہونے سے پہلے ہی طے کی گئی تھی اور لارڈز ٹیسٹ کے دوران سامنے آنے والے تنازع کے بعد بھی شیڈول کے مطابق برقرار ہے۔
دوسرے ٹیسٹ کے پہلے روز لنچ کے دوران اسکائی اسپورٹس نے سابق پاکستانی کپتان اور وزیراعظم عمران خان کے بیٹوں سلیمان خان اور قاسم خان کا انٹرویو نشر کیا۔انٹرویو میں دونوں بھائیوں نے اپنے والد کے ساتھ روا رکھے جانے والے سلوک اور ان کی سیکیورٹی سے متعلق تحفظات کا اظہار کیا، جبکہ برطانوی حکومت کے ردعمل پر بھی تنقید کی۔انٹرویو نشر ہونے سے پہلے پاکستان کرکٹ بورڈ کی جانب سے دوسرے ٹیسٹ کے دوبارہ شروع نہ کرنے اور تین میچوں کی سیریز کے باقی میچز منسوخ کرنے کا امکان ظاہر کیا گیا تھا۔تاہم تنازع کے باوجود پاکستانی ٹیم لنچ کے بعد مقررہ وقت پر میدان میں واپس آگئی اور میچ جاری رہا۔پاکستانی ٹیم کے کوچ سرفراز احمد نے دوسرے روز کہا کہ انہیں انٹرویو کے بارے میں کوئی علم نہیں اور وہ صرف میچ پر توجہ مرکوز کیے ہوئے ہیں۔
یہ بھی پڑھیں: سپریم کورٹ، بانی پی ٹی آئی کی ہسپتال منتقلی کا معاملہ، عظمیٰ خان کی فوری سماعت کی درخواست مسترد
دوسرے ٹیسٹ کے اختتام پر کپتان بابر اعظم نے بھی میچ نہ کھیلنے کی کسی دھمکی کی تردید کرتے ہوئے اسے افواہیں قرار دیا۔73 سالہ عمران خان پاکستان کے سابق عالمی شہرت یافتہ آل راؤنڈر ہیں، جنہوں نے 1992 کا ورلڈ کپ جیتنے والی پاکستانی ٹیم کی قیادت کی تھی۔وہ 2018 سے 2022 تک پاکستان کے وزیراعظم رہے اور اس کے بعد انہیں مختلف مقدمات کا سامنا کرنا پڑا، جن میں بدعنوانی کے الزامات بھی شامل ہیں جن کی وہ تردید کرتے ہیں۔گزشتہ برس دسمبر میں عمران خان کی بہن علیمہ خان نے کنگ چارلس سے دولتِ مشترکہ کے سربراہ کی حیثیت سے پاکستان کی صورتحال پر آواز اٹھانے کی اپیل بھی کی تھی۔
