لاہور( پاک ترک نیوز) پاکستان ریلوے نے لاہور اور ٹیکسلا کے تاریخی ریلوے اسٹیشنوں کی بحالی، تحفظ اور جدید خطوط پر ترقی کے لیے ماسٹر پلان کو حتمی شکل دے دی ہے۔
پاکستان ریلوے کے مطابق منصوبوں کا مقصد تاریخی ورثے کو محفوظ رکھتے ہوئے مسافروں کو جدید سہولیات فراہم کرنا اور سیاحت کو فروغ دینا ہے۔ منصوبوں پر عمل درآمد میں حکومت پنجاب بھی تعاون کرے گی۔
لاہور ریلوے اسٹیشن پر تاریخی عمارت اور پلیٹ فارمز کی مرمت، عمارت کی ساختی بحالی، نکاسی آب کے نظام کی بہتری، تاریخی طرز کی لائٹنگ، جدید فیملی لاؤنج، ریزرویشن اور معلوماتی مراکز کی اپ گریڈیشن سمیت مسافروں کے لیے نئی سہولیات فراہم کی جائیں گی۔
یہ بھی پڑھیں: پٹرولیم مصنوعات کی قیمتیں روزانہ کی بنیاد پر مقرر کرنے کا فیصلہ مسترد
دوسری جانب ٹیکسلا ریلوے اسٹیشن پر پیدل چلنے والوں کے لیے واک ویز، منظم پارکنگ، جدید واش رومز، تاریخی ٹکٹ آفس کی بحالی، پرانے گڈز ویئر ہاؤس کو کیفے اور ریسٹورنٹ میں تبدیل کرنے، خوبصورت عوامی مقامات کی تعمیر اور ٹیکسلا کے ثقافتی ورثے پر مبنی نمائشیں قائم کرنے کا منصوبہ شامل ہے۔
پاکستان ریلوے کا کہنا ہے کہ دونوں منصوبے بین الاقوامی ورثہ تحفظ کے اصولوں کے مطابق مکمل کیے جائیں گے، جن سے تاریخی عمارتوں کا تحفظ، مسافروں کو بہتر سہولیات کی فراہمی اور سیاحت کے فروغ میں مدد ملے گی۔
